Michigan dá unha advertencia a Biden sobre o apoio ao xenocidio en Gaza: máis de 100.000 votantes non apoian ningunha lista

Michigan, nos Estados Unidos, é un dos considerados Estados clave nos comicios presidenciais, ao apoiar segundo a votación candidaturas republicanas ou demócratas, algo determinante tendo en conta que o mandatario é elixido en base ao número de representantes outorgado por cada Estado e non pola cifra global de votos. Alí, confirmouse na madrugada de hoxe que o actual ocupante da Casa Branca, Joe Biden (Partido Demócrata), e o anterior inquilino, Donald Trump (Partido Republicano) impuxéronse en cadansúa primaria, e todo indica que repetirán en novembro a pugna electoral que protagonizaron en 2020. No caso demócrata, Biden fíxose con 81% das preferencias do electorado estatal, moi por diante das outras dúas candidaturas internas. Así e todo, en segundo lugar ficou a opción do voto “non comprometido”, utilizada para rexeitar todas as candidaturas, con 13% dos sufraxios. O movemento para impulsar esta alternativa foi lanzado a comezos deste mes pola activista Layla Elabed, que agradeceu “ás nosas organizacións progresistas locais e nacionais e aos nosos votantes de conciencia” por usar “o noso proceso democrático para votar contra a guerra, o xenocidio e a destrución dun pobo e dunha terra”, en alusión á agresión militar de Israel contra o territorio palestino de Gaza, apoiada por Washington e denunciada por persoas expertas da Organización das Nacións Unidas (ONU) como limpeza étnica e xenocidio. A campaña ‘Escoita Michigan’ fixo fincapé en que en 2016 Trump gañou no Estado a Hillary Clinton por pouco máis de 10.000 papeletas, o obxectivo de votos sen compromiso que se marcaron. Porén, lograron facerse con máis de 100.000 sufraxios, uns datos que “poderían ser motivo de preocupación [para Biden] nun Estado que gañou por menos de 3% en 2020 e que probabelmente non pode darse o luxo de perder este ano”, apuntou a axencia AP. Precisamente 3%, 300.000 persoas, é a porcentaxe de poboación de orixe árabe de Michigan, a máis alta do país. Hamás estuda unha proposta de alto o fogo mentres Biden preme Israel “Ao superar os 20.000, o voto non comprometido vólvese unha cuestión nacional”, explicou á axencia Lusa a profesora na Universidade de Boston Daniela Melo, que afirmou que “todo isto será interpretado como un gran desafío a Biden”, que conta “con marxes moi pequenas para conseguir unha vitoria” e que podería ter un “problema serio” se o voto das persoas novas, árabes e da facción máis progresista do Partido Demócrata se unen nun “voto de protesta”. En todo caso, abre a porta a que a política exterior teña “un peso moito maior que en eleccións pasadas”. No que atinxe a Ucraína, Trump está a encabezar as críticas ás entregas de armas e ao financiamento de Kíiv, especialmente ante a súa falta de éxitos no campo de batalla, e sobre Israel, enquisas como a do Data for Progress revelaron que tres de cada catro votantes demócratas defende un alto o fogo en Gaza, algo que Biden non demandou até este mes, no marco da perda de apoio no Sur Global e do incremento da presión de Washington contra Israel para que acepte o cesamento de hostilidades, o que non se traduciu en medidas prácticas, como amosou o último veto no Consello de Seguridade da ONU a unha proposta que reclamaba a fin da agresión militar. O certo é que os Estados Unidos, principal aliado e provedor de armas israelí, contan cunha importante influencia sobre o réxime de apartheid sionista. Proba disto foi a orde para que co final de 2023 reducise o volume de bombardeos indiscriminados contra a poboación civil, que se reflectiu nas estatísticas de persoas asasinadas por Israel, que, mentres que nos primeiros 75 días de agresión matou máis de 21.000 palestinas e palestinos en Gaza, desde o comezo de 2024 diminuíu os homicidios confirmados até arredor de 8.500. Máis da metade de estadounidenses cren que Trump e Biden son demasiado maiores para competir pola Casa Branca Primarias republicanas Ao respecto das votacións nas primarias republicanas, Trump, que como Biden vencera en todos os Estados até o de agora, volveu saír vitorioso fronte á ex gobernadora de Carolina do Sur e ex embaixadora na ONU Nikki Haley con 68% das papeletas e máis de 40 puntos de vantaxe. Haley rexeitou retirarse das primarias, cando menos até coñecerse os resultados da vindeira terza feira, cando máis dunha ducia de Estados levarán a cabo as súas votacións, e tras as que se prevé, cando menos de facto, que quede definida a candidatura republicana e demócrata. Os medios locais e internacionais desataron as especulacións nas últimas xornadas sobre as motivacións de Haley para non renunciar incluso nun momento no que a súa vitoria está definida amplamente como case imposíbel. En primeiro lugar conta cos cartos para seguir, o eixo principal de calquera campaña estadounidense. Só en xaneiro, recadou 15 millóns de euros. En paralelo, sinálase que pode tratarse dunha tentativa de prepararse para unha posíbel candidatura presidencial en 2028, e, en última instancia, sería a mellor colocada para suceder Trump no caso improbábel de que prosperen as demandas para impedir que se presente en varios Estados pola súa relación co intento de golpe de Estado en 2021. Confirmadas varias mortes por inanición na Faixa Crianzas orfas, mortas por desnutrición e sen esperanza no inferno de Gaza: "Nenos de cinco anos din que queren morrer" A organización non gobernamental Save the Children corroborou os reportes das autoridades de Gaza de que múltiples crianzas faleceron por inanición, facendo énfase en que “o que estamos a presenciar é unha matanza masiva de nenos e nenas a cámara lenta porque non lles queda comida e non lles chega nada. Están morrendo porque o mundo non as protexeu”, resolve. Nesa liña, os equipos da ONU encargados da axuda humanitaria denunciaron que Israel “nega sistematicamente” a entrega da axuda á vez que dispara aos convois que a transportan. Desde outubro, Israel asasinou no enclave 29.954 persoas, e feriu outras 70.000 máis. No que respecta ás negociacións para un alto o fogo, que incluiría un intercambio de persoas detidas entre Hamás, que goberna a Faixa, e o Goberno de ultradereita israelí, Basem Naim, alto cargo da organización palestina, adiantou que “a fenda segue a ser ampla”, e ratificou que non aceptarán ningún acordo que non supoña un alto o fogo definitivo, a retirada das tropas sionistas de Gaza e a recuperación da liberdade de circulación no territorio, recalcando que “a xente na parte norte de Gaza está a morrer de fame, sabemos exactamente o que isto significa, as nosas familias aínda están alí”.