Centos de persoas congregáronse diante do centro de saúde de Chantada convocadas pola plataforma Chantada quere sanidade para expresar un “clamor unánime a prol dunha atención sanitaria pública con calidade asistencial para o que é necesario que Chantada teña o persoal médico e de enfermaría”.
No manifesto lido pola voceira da plataforma, Mari Maciñeiras, subliñáronse os continuados recortes que “levamos padecendo, a falta de especialistas no hospital comarcal de Monforte e os centos de millóns de euros que se levan recortando desde a Xunta da Galiza e que explican que hoxe se invista menos que no ano 2009”.
“As persoas afectadas nos centros de saúde de Chantada e Carballedo non imos permitir que se sigan pondo en risco as nosas vidas, porque os recortes e as políticas de desmantelamento e privatización da sanidade matan”, inciden desde a plataforma.
Máis accións
Desde a plataforma aseguran que continuarán desenvolvendo accións e dirixíndose á xerencia na procura de solucións para os centros de saúde e máis para o hospital comarcal, cuxa directora, manifestan, “debe dimitir”.
A plataforma Chantada quere sanidade está recollendo sinaturas e estudará “emprender novas mobilizacións polas rúas da vila chantadesa até que haxa unha solución satisfactoria para os nosos centros de saúde”.