O Consorcio Provincial Contra Incendios e Salvamento da Coruña mantivo esta quinta feira unha xuntanza na que se aprobou por unanimidade o paso a persoal laboral fixo de 174 prazas subrogadas desde o 1 de xaneiro de 2020 das empresas que prestaban o servizo, sendo este o primeiro acordo deste tipo conseguido a nivel galego.
Trátase dunha das principais demandas que levou o persoal de extinción de incendios urbanos de todo o país a protagonizar unha das maiores protestas do sector.
A mesa de negociación estivo integrada polo deputado provincial José Ramón Rioboo Castro, o subdirector Xeral de Seguridade e Coordinación da Dirección Xeral de Emerxencias e Interior da Xunta da Galiza, Andrés Igrexas López, o xerente do Consorcio, José Luís Barca Añón, e as asesoras xurídicas da entidade Graciela Riveiro e María Luisa Pena, así como agrupacións sindicais representativas dos traballadores e traballadoras.
Na reunión, mantida nas instalacións do Consorcio en Carballo (comarca de Bergantiños), acordouse entre a entidade provincial e a parte sindical a incorporación destes 174 profesionais dos nove parques provinciais –Carballo, Arteixo (comarca da Coruña), Betanzos (As Mariñas), Arzúa (comarca homónima), Boiro e Ribeira (O Barbanza), As Pontes (Eume), Santa Comba (Xallas) e Cee (comarca de Fisterra)– como persoal laboral fixo do Consorcio, así como o recoñecemento da antigüidade dos traballadores e traballadoras.
A formalización da aprobación definitiva terá lugar na vindeira sesión plenaria do Consorcio, programada para o vindeiro 26 de abril.
