'Cota cero' para todos os autónomos? Desde o sector piden que a renda inflúa porque "hai quen a precisa e quen non"

Un 20% do emprego actual na Galiza pertence a persoas que traballan por conta propia. O dato, comparado co 16% de media que ten o Estado español, indica a importancia que ten te sector para o tecido laboral do país. Porén, o seu estado non é óptimo desde hai anos e conta con eivas que impiden o seu desenvolvemento. Segundo datos facilitados pola Asociación de Traballadores Autónomos (ATA) na Galiza, desde setembro de 2022 até o mesmo mes deste ano perdéronse 1.257 afiliacións (-0,6%), pasando de 207.011 até 205.754. Esta situación preocupa ás entidades que representan ao sector, algunhas delas presentes na Mesa de Emprego Autónomo. O anuncio esta segunda feira por parte da Xunta da Galiza de aprobar de cara 2024 unha "cota cero" para estimular a creación de emprego autónomo reabriu o debate sobre como frear a súa diminución progresiva. A iniciativa do Goberno galego propón unha axuda de 960 euros para subvencionar as contías que deben pagar durante o primiero ano, que se sumarán aos, como máximo, 7.500 euros doutras xa existentes para gastos de inicio de actividade. Un paso atrás En opinión do presidente da Unión de Profesionais e Traballadores Autónomos (UPTA), Eduardo Abad, a entidade que representa continúa "en contra das tarifas planas ou tarifas cero de forma universal" como solución. Entende que "hai persoas que si necesitan unha axuda para pór en marcha o seu negocio e hai outras que teñen as condicións favorábeis para poder facelo". Por este motivo, desde esta asociación demandan que se teña en conta as persoas nas que "o seu rendemento de traballo estean por debaixo do salario mínimo interprofesional (SMI)" e en caso contrario deberían "devolver a subvención". A Galiza é o territorio con máis accidentes mortais de autónomos Para Abad, as axudas por parte da Administración galega non deben quedar só "en colaborar para pagar á Seguridade Social" e considera que fan falta "políticas de reemprendemento que faciliten o relevo xeracional e que vaian directamente ás necesidades das autónomas e dos autónomos". Neste sentido, valora a proposta da Xunta como "un paso atrás" se non ten en contra outros temas segundo sexa a situación de quen solicite a axuda. Falta de relevo xeracional Desde a Asociación de Traballadores Autónomos (ATA) na Galiza sinalan que levaban “tempo” solicitando este tipo de medidas “que xa estaban en marcha noutros territorios do Estado español”. O presidente deste entidade, Rafael Granados, lembra a Nós Diario que “na última década perdemos 10.000 autónomas e autónomos”, co factor importante de que "a maior parte eran persoas menores de 45 anos". Valora positivamente o anuncio mais agarda que se manteñan as axudas xa existentes, introducindo tamén outras encamiñadas cara o relevo xeracional. “Precisamos que se apoie ás persoas que se xubilan agora, que son moitas, para que o seu negocio continúe aberto”, indica o responsábel de ATA, “e conseguir que os novos e as novas que entren poidan continuar ese traballo en ámbitos que dan beneficios”, engade. As axudas Impacto Autónomo exclúen as explotacións agrarias con menos recursos Comercio e agricultura ATA apunta dous sectores como os máis prexudicados pola perda de autónomas e autónomos: o comercio e a agricultura. Segundo ATA na Galiza, desde setembro de 2022 até o mesmo mes deste ano o comercio perdeu 1.254 traballadoras e traballadores (-2,7%), pasando de 47.073 a 45.819. No caso da agricultura, no mesmo período, a perda foi de 980 empregos, pasando de 25.741 a 24.761. Para Granados, unha das explicacións para que se dea esta situación é que ambos os dous sectores “sofren unha transformación enorme”, aínda máis forte, sobre todo, “no que é o comercio galego de proximidade coa chegada das vendas online”. Por este motivo demanda accións que leven até unha “especialización, poder vender tamén en internet e non agardar a que o cliente entre pola porta”. A adaptación nestes sectores, para ATA, terá que vir da man “de contar con que a compradora ou o comprador de quince anos atrás non é o igual que o que hai hoxe”. No caso do sector agrario, Granados sinala o problema “da idade cada vez máis alta que teñen as persoas responsábeis das explotacións”, unha característica que se suma “á desaparición das pequenas granxas en favor doutras máis grandes”. A Galiza perdeu no mes de xaneiro máis de 40 autónomos por xornada “Existe aínda un gran estigma sobre a figura da persoa que traballa por conta propia”, asegura o responsábel de ATA, “sobre todo desde o ámbito universitario, polo que cómpre asegurar que na educación se teña en conta esta figura”, estima. Porén, admite que as características do emprego autónomo, en xeral e tamén na Galiza, sempre contaron "con certo risco polo investimento que supón para sacarlle un rendemento a curto, medio ou longo prazo, dependendo da actividade do sector". E iso, para Rafael Granados "no actual momento económico de inflación que temos é algo moi dificil de atallar". Profesionais exixen mellorar a fiscalidade do sector Unha das preocupacións do sector segue a ser a súa fiscalidade. “Tal e como está a subministración e a materia prima na actualidade é moi difícil afrontar as cotas”, sinala a Nós Diario Rafael Granados, “non todo é financiamento, tamén é importante facilitar que haxa autónomas e autónomos actuando sobre a propia fiscalidade”. O responsábel de ATA na Galiza bota man dun informe que a súa entidade, a nivel estatal, presentou este mesmo mes. Nel indícase que só 33,2% das persoas que traballan por conta propia aseguran que a súa facturación aumentou este último ano, mentres que 84,5% afirma que os gastos aumentaron ao longo de 2023. Aumento da inflación As vendas das autónomas e dos autónomos, a nivel estatal, medraron de media nos dous últimos anos 11%, mais os gastos incrementáronse 23%. No informe, admiten que a inflación xunto coas cotizacións e os impostos foron os principais atrancos que puxeron en risco a continuidade de moitos negocios, xa que a inflación afecta nove de cada dez autónomas e autónomos (87,4%), o facer fronte aos impostos dificulta o negocio a 84,8% e facer fronte ás cotizacións afecta a 79,9% do colectivo.