Pór en valor o galego na música e, nomeadamente, no rock. Eis a razón polas que Raiba, Aspergillus de Coira e Deseqilibrio mental decidiron organizar este ano o festival Terra de lobos. Un encontro no que presentarán, aliás, os seus últimos traballos.
Preténdese reivindicar o idioma galego como lingua válida para as artes escénicas e a música
Será na Sala Capitol, na capital de Galiza, esta quinta feira (19 de maio) ás 21h. A data non é casual senón que visa sumarse á ampla axenda cultural con motivo do Día das Letras pois "preténdese reivindicar o idioma galego como lingua válida para as artes escénicas e a música" para alén de "chamar a atención da industria musical, os medios de comunicación, dos festivais e as salas para que aposten decididamente por grupos que empregan o galego nas súas composicións".
Mais tamén queren empregar o festival como escaparate dos seus propios traballos "reivindicarnos a nós mesmos como bandas e amosar a calidade" da súa música, subliñan.
Novos traballos
E é que están de estrea. Raiba vén de rematar o seu terceiro traballo intitulado Historias Na Pel. O disco poderá descargarse de maneira gratuíta através da rede e tamén mercarse en formato físico no propio festival.
Pola súa banda, Deseqilibrio mental presentará os temas do seu próximo traballo poucos días antes de lanzar o primeiro video musical do álbum. Asemade, Aspergillus de Coira dará a coñecer a súa "ópera prima" 'Éxodo'.
As entradas pódense mercar na Tenda A Reixa e o bar O Pozo (5€) ou na propia billeteira da Capitol o propio día (8€).