Tareixa Navaza: "Non podemos falar de democracia plena nin glorificar a Transición cando nin sequera temos medios públicos libres"

Non hai temporal que quebre o compromiso de Tareixa Navaza (Compostela, 1947). Non o lograron as represalias padecidas pola súa postura no traslado dos restos de Castelao ou na reconversión do naval, nin tampouco o cancro de colon contra o que levaba meses loitando. Pregúntolle como se atopa e mergúllase nunha defensa apaixonada da sanidade pública. Para ela, o colectivo está sempre por riba do individual. É, sen dúbida, a gran pioneira do xornalismo galego, pero non polos anos de experiencia, senón polo exemplo.