O portavoz de En Comú no Parlamento de Catalunya, David Cid, considera que o novo financiamento pactado por PSC e ERC "non é un cupo" como o que funciona en Euskadi e asegura que é unha formula solidaria que será "positiva para todas as comunidades autónomas".
Nunha entrevista na Cadena Ser, Cid fixo fincapé en que o acordo "non cita a palabra cupo, porque non é un cupo", senón que tan só "fixa o que Catalunya vai ter" e que é algo que tamén se pode adoptar no resto de autonomías.
"O que fixa é que imos ter maior participación no que é a xestión, mais sobre todo nunha parte da recadación dos impostos, algo que é positivo para todas as comunidades autónomas", expresou o portavoz de En Comú.
Ao seu parecer, os servizos públicos que dependen do conxunto de autonomías, como a sanidade, a educación ou a dependencia, "están infrafinanciados" no País Valencià, en Balears e en Catalunya, e por tanto, que haxa un novo sistema de financiamento en Catalunya é "unha oportunidade para todas as comunidades autónomas".
Cid lembrou que, a diferenza doutras comunidades, Catalunya ten un Estatut de autonomía que inclúe a "Policía autonómica", ou a "política penal", entre outras cuestións. "Por tanto, é razoábel que o Estado permita que as comunidades autónomas que teñen este Goberno singular teñan os recursos para podelo xestionar", sentenciou.
"Un acordo solidario"
Cuestionado por como se pode cambiar o modelo común e ser solidario ao mesmo tempo desde un partido de esquerdas, Cid respondeu que "o único límite que sitúa á solidariedade territorial é o igual esforzo fiscal das comunidades autónomas".
"Catalunya, froito do acordo orzamentario dos 'comúns', mantén o imposto de patrimonio, o imposto de sucesións e aumentamos o IRPF ás rendas máis altas. Con todo, as comunidades autónomas do Partido Popular están a xerar unha enorme desigualdade a nivel social ao eliminar eses impostos fundamentais para redistribuír a renda e ter igualdade de oportunidades. E logo reclaman que o Estado os compense", reprochou. Así, Cid responsabilizou ás políticas fiscais dos populares de ser "o principal elemento de desigualdade territorial e social".
Formación do Govern
Respecto á formación do novo Govern da Generalitat de Catalunya, Cid expresou que desde o seu partido non lles sorprende que o novo president, Salvador Illa (PSC), non fixese ningunha "chiscadela" a En Comú xa que non teñen un acordo de lexislatura coa formación socialista.
E neste sentido manifestou que a eles impórtalles que o president cumpra o que "si" acordaron respecto á vivenda e á regulación dos pisos turísticos. "Os comúns, neste momento, non estamos no Govern senón que asinamos un acordo para a investidura. E a relación e confianza co Partido Socialista irase construíndo en función do cumprimento do acordo", recalcou. Por último, Cid expresou que "non é unha sorpresa" que Illa, elixise conselleiros "claramente conservadores", porque considera que "é a liña que tivo o PSC estes últimos anos en Catalunya".