Cruzamento de acusacións de xenofobia e racismo no debate das europeas ao falar de inmigración
As candidatas ás eleccións europeas do PSOE, Sumar e Podemos criticaron duramente, no debate organizado por RTVE na noite desta quinta feira, a linguaxe "racista e xenófoba" do cabeza de lista do ultradereitista Vox, Jorge Buxadé, quen insistiu en máis dunha ocasión en vincular a migración irregular coa criminalidade. Pola súa parte, PP e Ciudadanos incidiron en asegurar unhas "fronteiras máis seguras" e unha inmigración "legal e ordenada".
No bloque de migración no debate, a candidata de Sumar, Estrella Galán, quen foi directora xeral da Comisión Española de Axuda ao Refuxiado (CEAR), lamentou o pacto migratorio aprobado en Europa, que ao seu xuízo "agrava a traxedia humana", e reprochou a Buxadé as súas "mentiras e odios" contra as persoas migrantes, "con esloganes que rompen a convivencia".
O cabeza de lista de Vox tirou das subvencións que recibiu o CEAR, uns 96 millóns de euros que, dixo, "non foron para axudar" pois o 50% "foi para salarios". Ademais, volveu vincular a inmigración irregular coa criminalidade, momento no que Irene Montero (Podemos) o cualificou de racista. "Vulnera os dereitos humanos", afeou ao dirixente do partido de Santiago Abascal.
Noutro punto, a socialista Teresa Ribera compartiu as palabras de Montero ao sinalar que "non é admisíbel o ton xenófobo e racista" de Vox durante o debate. "Non é admisíbel traballar sobre a base do odio e levantamento de muros", sentenciou a vicepresidenta do Goberno español, para despois defender o pacto migratorio e o principio de solidariedade, tamén en Andalucía e Canarias, dúas comunidades que "non deben asumir por si soas" a chegada de migrantes. Aí reprochou a Dolors Montserrat (PP) que o resto das comunidades gobernadas polos populares non axuden estas dúas rexións.
Ao fío desta cuestión, Montserrat alegou que Europa "necesita unhas fronteiras máis seguras", recalcando a loita contra as mafias e co foco nunha "inmigración legal, ordenada, vinculada a un emprego e, sobre todo, integrada, que defenda os valores europeos". A candidata do PSOE tamén recriminou á popular que "copie" a Vox neste asunto, "tamén nas palabras e nos feitos".
Montserrat tamén pediu á candidata do PSOE que apoie ás Forzas e Corpo de Seguridade do Estado, mentres Ribeira exixiu ao PP unha desculpa despois de que, a xuízo da vicepresidenta, Alberto Núñez Feixoo "cuestionase" o informe da UCO na investigación do caso que afecta Begoña Gómez durante unha entrevista radiofónica.
Entre tanto, Irene Montero cargou contra o pacto europeo pola migración, insistindo na súa derrogación, para criticar despois de que o que sobra en Europa son "os fondos voitres, especuladores e as grandes corporacións estranxeiras que non saben nin onde está España".
Mais Jordi Cañas, de Ciudadanos, reprochou esta visión, insistindo en que "este país non pode acoller a todo o mundo", e mesmo reprochou que ver a situación da migración "cando vive en Galapagar" —en referencia á vivenda de Montero— é "diferente" a cando se está nun barrio obreiro.
A este respecto, a candidata de Agora Repúblicas, Diana Riba, afeou as palabras de Cañas ao ironizar que El Born de Barcelona sexa un barrio traballador, ao que o representante de C's lle espetou: "Teño eu máis migrantes na porta da miña casa que ti na túa, seguro".
E non foi ese o único choque do bloque que protagonizou a candidata de Agora Repúblicas. Riba afeou que a Unión Europea "regale 400 millóns" a países como Marrocos ou Mauritania para que "fagan eles" as vulneracións de dereitos humanos, e meteu no mesmo saco PP e Vox con Junts, sinalando que tamén defende "seleccionar migrantes".
Dito isto, Aleix Sarri, de Junts, exixiu unha rectificación e unhas desculpas, á vez que subliñou despois que Catalunya debe poder controlar a migración como fan outros estados da Unión Europea. "Ao Govern catalán parece que lle dá medo ter estas competencias. Somos independentistas e queremos que todas as competencias sexan xestionadas por e desde Catalunya", resolveu.
Palestina
Sumar e Podemos aproveitaron o debate para para se referiren ao conflito en Palestina e denunciaren o que consideran un xenocidio por parte de Israel, e a candidata dos morados retou a socialista Teresa Ribera a que "recoñeza" ese xenocidio, pero a vicepresidenta declinou o envite. Así mesmo, Montero recriminoulle que o Goberno español anunciase na mañá desta quinta feira que se suma á demanda presentada por Suráfrica ante a Corte Internacional de Xustiza contra Israel por presunta violación da Convención contra o Xenocidio e que "esa alegría" que sentiu "moita xente" quedou transformada en "dous minutos exactos" en "rabia e desesperación" na rolda de prensa do ministro de Exteriores, José Manuel Albares, que ao seu xuízo dixo "cousas inaceptábeis" como que "España non toma partido". "Di manterse neutral entre un Estado xenocida e un pobo masacrado", lamentou.
Ao seu xuízo, as decisións que está a tomar Europa sobre a guerra "si están a romper os principais consensos europeos que teñen que ver coa paz, co antifascismo e co benestar dos pobos", manifestou, preguntándose ao mesmo tempo que, "se Europa non é capaz de construír paz e sobre todo de acabar co xenocidio en Palestina, para que serve Europa?".
Ao fío, Montero apelou de novo a Ribera preguntándolle de forma directa que se o Estado español non vai á Corte Internacional para "acusar o xenocida Netanyahu" de xenocidio, "para que narices vai?". "Que ata o Goberno co Estado xenocida de Israel para non romper relacións diplomáticas e comerciais cando por moito menos rompémolas con Arxentina?", insistiu.
Foi neste punto cando a candidata da formación violeta interpelou Ribera para que recoñeza que o que está a facer Israel a Palestina é "un xenocidio", algo ao que a socialista declinou responder de forma directa, aínda que sostivo que o "asunto do xenocidio" está no debate e que por iso Moncloa decidiu sumarse a Suráfrica. "Estamos no lado correcto da historia", limitouse a dicir.
A candidata de Sumar, Estrella Galán, arrincou a súa intervención pedindo ás forzas políticas presentes no debate de RTVE que fagan unha condena firme e determinante polo "xenocidio" que está a ocorrer en Palestina, lembrando o bombardeo que esta mesma quinta feira Israel executou nunha escola da UNRWA en Gaza e que deixou polo menos 40 mortos.