Corea do Sur pon o foco en Pontevedra: Unha delegación de Suncheon estuda o modelo urbano da cidade do Lérez
Suncheon é coñecida como a capital ecolóxica de Corea do Sur e conta con espazos únicos grazas aos seus famosos humidais, como o primeiro xardín nacional do seu país.
O alcalde de Pontevedra, Miguel Anxo Fernández Lores, recibiu esta terza feira unha delegación da cidade surcoreana de Suncheon que se desprazou até a cidade do Lérez para estudar e comprender o modelo urbano de Pontevedra, así como a transformación realizada ao longo das últimas dúas décadas.
Suncheon é coñecida como a capital ecolóxica de Corea do Sur e conta con espazos únicos grazas aos seus famosos humidais, como o primeiro xardín nacional do seu país. É unha cidade de 290.000 habitantes que está a estudar fórmulas para aliviar a conxestión de tráfico e crear unha contorna de transporte ecolóxico.
Segundo lle transmitiron aos responsábeis municipais pontevedreses, en Suncheon queren avanzar na idea de facer unha cidade centrada nas persoas e non nos automóbiles, promovendo o uso do transporte público, a bicicleta e a mobilidade a pé para combater o cambio climático.
Fernández Lores, acompañado do director xeral de Protección e Seguridade cidadá, Daniel Macenlle, mantivo unha reunión coa delegación de Corea do Sur, formada por sete traballadoras de distintas áreas e departamentos da administración local da cidade de Suncheon.
Durante a súa exposición, o alcalde explicou os diferentes elementos e factores que "permitiron a Pontevedra transformarse nunha cidade referente no mundo respecto á mobilidade peonil".
Algunhas das preguntas realizadas pola delegación de Suncheon viraron ao redor da dificultade de implementar medidas que limiten o tráfico, a oposición cidadá ou cales son os aspectos máis importantes á hora de tomar decisións nese sentido.