A Marcha Mundial das Mulleres (MMM) de Ourense convocou para esta segunda feira, 2 de setembro, unha concentración ás portas do CEIP Prácticas, para protestar contra a incorporación á docencia dun profesor condenado por abusos e agresións a alumnas doutro centro, o CPI Virxe da Saleta, en San Cristovo de Cea (comarca do Carballiño).
Este docente foi condenado a 13 anos de prisión e 21 anos e medio de inhabilitación en calquera oficio que supoña contacto regular a directo con persoas menores de idade. A sentenza emitida en xullo de 2024 non é firme, de aí que ao home, de 45 anos, se lle permita incorporarse neste curso 2024-2025 ao seu posto de traballo.
Desde a MMM exixen a “inmediata” intervención da Consellaría de Educación pois defenden que “ante denuncias de agresión e abuso cómpre apartar o acusado cautelarmente” mentres a instrución e o proceso de denuncia identifiquen as responsabilidades. Os procesos xudiciais son longos até que hai sentenzas firmes, afirman nun comunicado, e iso “non pode ser unha escusa para permitir que un agresor manteña contacto con potenciais agredidas”.
No caso concreto denunciado por este colectivo feminista, os feitos probados que aparecen na sentenza “alertan da irresponsabilidade colectiva que supón permitir que unha persoa que cometeu abusos empregando a súa autoridade como docente manteña contacto co alumnado”.
A MMM demanda a intervención inmediata de Educación. Do contrario, “converterase en cómplice do agresor”, ao permitir, entenden, que este continúe mantendo contacto con alumnas, “facilitándolle as ferramentas para estar en disposición de cometer novas agresións”.
Sinalan tamén á responsabilidade da Dirección do centro, o CEIP Prácticas, que entende debe pór ao dispor de alumnas e familias “todas as ferramentas posíbeis para garantir a seguridade das crianzas”. A Marcha Mundial das Mulleres considera que a Dirección do CEIP Prácticas debe negarse á incorporación deste docente ao seu claustro de profesorado e, ao mesmo tempo, instar a Consellaría de Educación a que o profesor sexa apartado da docencia para que non se incorpore ás aulas.
Coa concentración que decorrerá esta segunda feira ás 10 horas ante o CEIP Prácticas de Ourense, a MMM quere mostrar o seu apoio ás alumnas e ás familias deste centro, “que teñen unha fonda preocupación porque as aulas sexan seguras”. “Convocamos a todas as persoas que acrediten que as aulas deben estar libres de agresores para a seguranza das nosas crianzas”, sentencia o comunicado.