O solsticio de verán ocorre cando o sol alcanza a máxima declinación (mínima no solsticio de inverno desde o hemisferio norte), proxectando a súa luz sobre a máxima latitude xeográfica na Terra.
Este ano tal circunstancia producirase esta quinta feira, día 20 de xuño, ás 20 horas 51 minutos UTC segundo cálculos do Observatorio Astronómico Nacional. Esta estación durará aproximadamente 93 días e 16 horas, e ramatará o 22 de setembro co comezo do outono.
O comezo do verán no hemisferio norte coincide co comezo do inverno no hemisferio sur.
O inicio das estacións vén dado, por convenio, por aqueles instantes en que a Terra se atopa nunhas determinadas posicións na súa órbita ao redor do Sol. No caso do verán, esta posición dáse no punto da eclíptica no que o Sol alcanza a súa posición máis boreal.
O día en que isto sucede, o Sol alcanza a súa máxima declinación Norte (+23º 27') e durante varios días a súa altura máxima ao mediodía non cambia; a esta circunstancia chámaselle tamén solsticio de verán. Neste instante no hemisferio sur iníciase o inverno.
O día do solsticio de verán corresponde ao de maior duración do ano. Ao redor desta data atópanse o día en que o Sol sae máis cedo e aquel en que se pon máis tarde. Un feito circunstancial non relacionado coas estacións dáse tamén nesta época:, o día en que o Sol e a Terra están máis afastados entre si ao longo do ano. Este ano será o 5 de xullo.
É este maior afastamento ao Sol a causa de que a Terra se mova máis lentamente ao longo da súa órbita elíptica durante o verán (segundo a coñecida como segunda lei de Kepler) e por tanto a duración desta estación sexa maior que outras.
O inicio do verán pode darse, como máximo, en tres datas distintas do calendario (do 20 ao 22 de xuño). Ao longo do século XXI o verán iniciarase nos días 20 e 21 de xuño (data oficial estatal), sendo o seu inicio máis temperán o do ano 2096 e o inicio máis tardío o de 2003.
As variacións dun ano a outro son debidas ao modo en que encaixa a secuencia de anos segundo o calendario (uns bisiestos, outros non) coa duración de cada órbita da Terra ao redor do Sol.
