O pasado sábado, día 10, saíu á venda —canda o Nós Diario— o terceiro número da revista de pasatempos A formiga no carreiro, a única en lingua galega que existe nestes momentos na Galiza. Encher ese espazo que actualmente está sen cubrir nos quiosques, como é ofertar unha revista de pasatempos de carácter léxico, numérico ou lóxico e que conte unha historia completa ao longo das súas páxinas, é precisamente o obxectivo desta revista editada por Sermos Galiza S.A..
A formiga no carreiro estreouse o pasado mes de xullo cunha primeira entrega que tivo unha grande acollida, con perto de 600 exemplares vendidos nos quiosques, a maiores dos que se agasallaron a todos os subscritores e subscritoras de Nós Diario. As persoas subscritas ao xornal recibiron este novo número de balde, e tivo un pequeno custo engadido de 1,80 euros para o resto de persoas lectoras. Ese é o mesmo prezo polo que aínda pode adquirirse nos quiosques de todo o país durante as próximas semanas.
Esta terceira entrega, novamente da autoría de Xoán Costa e Xerardo Rodríguez Roca, xira arredor do tema do Entroido a través de 48 páxinas nas que se ofrece unha ampla variedade de xogos para adestrar o cerebro, desde pasatempos clásicos como as sopas de letras ou os encrucillados até outros orixinais. Ademais, inclúe algúns xogos en portugués, co obxectivo de promover o uso desta lingua entre a cidadanía da Galiza.
"Todos os pasatempos, que moitas lectoras e lectores habituais xa coñecen a través do Nós Diario e o Sermos Galiza —que inclúen dúas páxinas de pasatempos en cada número—, están guiados pola formiga, que vai contando unha pequena historia para presentar as diferentes experiencias e desafíos. As formigas son as grandes protagonistas", explica Xoán Costa.
E por que a formiga? "É un animal moi presente no noso día a día, na vida cotiá, e queremos reflectilo nesta revista de pasatempos", di Costa, que pon como exemplo a toponimia, pois atopamos no país lugares como o Camiño da Formiga, na parroquia redondelá de Cedeira, ou mesmo alén do planeta, como é o caso da nebulosa da Formiga, a uns 3.000 anos luz da Terra.
