Galiza é a segunda autonomía onde máis medraron os prezos desde o estalido da Covid

Esta quinta feira coñecéronse os datos definitivos do Índice de Prezos de Consumo (IPC) relativos ao mes de novembro, publicados polo Instituto Nacional de Estatística (INE). Na Galiza, a inflación subiu 3,3% en comparación co mesmo mes do ano anterior, nunha repunta tres décimas porcentuais menor que a taxa interanual de outubro. Porén, o IPC interanual da Galiza situouse unha décima por riba da taxa de 3,2% de incremento no conxunto do Estado, nun mes de novembro no que se produciu unha moderación da taxa debido ao abaratamento dos carburantes e a un menor incremento da alimentación. Aínda así, a maior suba interanual en novembro, de 9,6%, produciuse precisamente en alimentos e bebidas non alcohólicas. Seguiulle a este capítulo o de hoteis, cafés e restaurantes (+6,4%), así como o de bebidas alcohólicas e tabaco (+5,7%). Pola súa parte, a única baixada deuse no apartado de vivenda, auga, electricidade, gas e outros combustíbeis (-6,9%). En termos mensuais, entre outubro e novembro, a inflación na Galiza baixou 0,2%, unha décima porcentual menos que no conxunto do Estado (-0,3%). Vestido e calzado (+4,7%) e alimentos e bebidas non alcohólicas (+0,6%) lideraron os ascensos. Pola contra, a baixadas máis acentuadas rexistráronse en vivenda, auga, electricidade, gas e outros combustíbeis (-1,7%), transporte (-1,4%) e en bebidas alcohólicas e tabaco (-1%). O IPC baixa tres décimas no Estado en novembro polo abaratamento dos carburantes e sitúase en 3,2 % Ademais, a inflación subxacente (sen alimentos non elaborados nin produtos enerxéticos), un dato que tan só se proporciona para o conxunto do Estado español, baixou sete décimas porcentuais, até 4,5%, unha taxa 1,3 puntos superior á do IPC xeral e a máis baixa desde abril de 2022, cando se situou en 4,4%. Por outra parte, desde o mes do estalido da pandemia da Covid, entre marzo de 2020 e novembro de 2023, a inflación aumentou 19% na Galiza, sendo a segunda autonomía entre as 17 do Estado na que máis incrementaron os prezos, tan só por detrás de Castela-A Mancha (+20%) e 1,8 puntos porcentuais por riba da media estatal (+17,2%). O IPC dos alimentos sobe seis veces máis na Galiza O incremento interanual do prezo dos alimentos e das bebidas non alcohólicas foi máis de medio punto porcentual superior na Galiza (+9,6%) que no conxunto do Estado español (+9%). Con todo, a estatística en termos mensuais foi moito máis negativa para as carteiras das galegas e galegos. Desta maneira, mentres que os prezos dos alimentos entre outubro e novembro permaneceron practicamente estábeis no conxunto do Estado español (+0,1%), a taxa de incremento na Galiza foi até seis veces superior (+0,6%). O encarecemento dos alimentos sitúa en 3,6% a inflación na Galiza, por riba da media estatal Por produtos alimentarios, neste caso nunha estatística que tan só ten en conta os datos estatais, os que máis subiron nos últimos 12 meses foron o aceite de oliva (+66,7%), o arroz (+17,1%); os legumes e as hortalizas (+16,8%), así como os produtos de confeitería (+16,6%).Ademais, outros alimentos rexistraron o pasado mes de novembro incrementos interanuais de dous díxitos no seu prezo, como é o caso da carne de porcino (+12,9%), doutros preparados alimenticios (+10,2%), das froitas frescas (+10,1%) e da carne de ovino (+10%). Alén da alimentación, tamén destacou o encarecemento dos paquetes turísticos no interior do Estado español, cunha suba de 21,4%. Por contra, o que máis se abaratou no penúltimo mes do ano en relación a novembro de 2022 foron outros aceites (-29,1%), o butano e o propano (-22,9%), o gas natural (-19,7%), os combustíbeis líquidos (-16,5%) e o transporte combinado de pasaxeiros (-15,4%). A nivel xeral, das 199 subclases de produtos que compoñen o calculo do IPC, 169 incrementaron os seus prezos interanuais, 26 baixáronos e catro non rexistraron variación.Ademais, o aceite de oliva, o produto cuxo prezo máis subiu en taxa interanual, encareceu 4,7% en termos mensuais e até 164,1% desde febreiro do ano 2021. Encarecemento de Nadal Os percebes son o produto que máis sobe (+21%) o seu prezo na recta final de cara ao Nadal con respecto ao custo que tiñan no fechamento de novembro, seguidos polas ameixas e pola pescada (+20%), o recoiro (+9%), a robaliza (+7%), o xamón ibérico de cebo (+3%), o ollomol e o año de leite (+2%), e o redondo de tenreira, que encarece 1%. Segundo os datos publicados onte pola Organización de Consumidores e Usuarios (OCU), a piña e a lombarda son os alimentos que máis baixan (-6%), por diante das angulas (-3%), que aínda así manteñen "o seu prezo prohibitivo", así como a granada (-2%) e o pavo (-1%). Pola súa parte, os lagostinos manteñen o mesmo prezo que tiñan a finais de novembro. En xeral, os prezos da cesta de Nadal están, actualmente, 1,6% por encima dos rexistrados o ano pasado. Ademais, fronte a finais de novembro, subiu o prezo de nove produtos da cesta, fronte a cinco que baixan e dous que o manteñen. Nos primeiros días de decembro, a OCU detectou un incremento medio do custo dos alimentos de 4,3%, unha suba moito maior que a experimentada en 2022, de 2,4%. O BCE decide manter o tipo de xuro nunha taxa de 4,5% Segundo decidiu esta quinta feira o Consello de Goberno do Banco Central Europeo (BCE), o tipo de xuro para as operación de refinanciamento manterase en 4,5%. Desta forma, o instituto emisor deixa os tipos intactos por segunda reunión consecutiva desde que pisou o freo na súa cita de outubro tras levar a cabo dez subas consecutivas do prezo do diñeiro, que o situaron no seu nivel máis alto en máis de 20 anos. Haberá unha nova escalada da inflación na zona euro? "As anteriores subas dos tipos de xuro seguen transmitíndose con forza á economía. O endurecemento das condicións de financiamento está a frear a demanda, o que está a axudar a reducir a inflación", sinalou o BCE nun comunicado, no que constatou que o crecemento económico "continuará sendo débil a curto prazo". O Euribor descende até o nivel de 3,719% Neste contexto, o Euribor a 12 meses, o principal índice de referencia para as hipotecas variábeis na Galiza, caeu esta quinta feira a 3,719% na súa taxa diaria, o que supón o seu menor rexistro desde o pasado 13 de abril, cando se situou en 3,718%. No que vai de mes de decembro marca unha media de 3,764%. A tendencia á baixa no Euribor rexístrase, de forma xeneralizada, desde novembro, cando o índice fechou na taxa de 4,022%.