O transporte pagará 3,6% máis pola redución da bonificación do combustíbel

Otransporte por estrada é un sector chave na economía e a loxística da Galiza e a nivel europeo seguirá sendo o modo de transporte máis utilizado debido ás vantaxes de flexibilidade, prazo de entrega e custo respecto aos outros modos de transporte. Porén, o incremento continuado do combustíbel nos últimos meses dificulta a súa estabilidade. O prezo dos carburantes remataron o mes de agosto coa gasolina nos 1,721 euros por litro, o seu valor máximo desde novembro de 2023. Pola súa parte, o prezo medio do diésel tamén seguiu o mesmo camiño e chegou aos 1,612 euros o litro, un nivel que non marcaba desde mediados febreiro, segundo datos do Boletín Petroleiro da Unión Europea (UE). No seu momento, en marzo de 2022, a bonificación acordada polo Goberno español salvou unha folga indefinida no sector do transporte. O Consello de Ministras e Ministros aprobaba o 27 de xuño a súa prórroga até o 31 de decembro de 2023 mais reducindo o importe a 10 céntimos/litro até finais deste mes de setembro e de 5 céntimos/litro até final de ano, con data final o 31 de decembro. Segundo o cálculo da bonificación total que corresponde até fin de ano, facilitado polo Ministerio de Transportes, Movilidade e Axenda Urbana, un camión pesado con masa máxima autorizada igual ou superior a 7,5 toneladas sería de 1.845 euros mentres que o de masa máxima inferior a 7,5 toneladas quedaría en 500 euros. Por último, nos vehículos lixeiros (furgonetas) sería 225 euros. A patronal galega do transporte pide ao Goberno español intervir o mercado dos combustíbeis Desde a Asociación Empresarial de Transporte de Mercadorías por Estrada da Galiza (Apetamcor), a entidade máis representativa entre as pequenas e medianas compañías transportistas da Galiza, a súa secretaria xeral, Myriam Otero, explica a Nós Diario que “o problema segue e seguirá” e lembra que o combustíbel representa “máis de 40% do custo das empresas de transporte e no caso galego, pola súa situación xeográfica, aínda máis, sobre todo nos percorridos internacionais”. Neste tema, Apetamcor demanda con urxencia que o Goberno español se comprometa “a ter un prezo estábel para planificar nós os prezos”. Falta de persoal O combustíbel non é o único problema para o sector. “Temos unha falta evidente de condutoras e condutores”, asegura Otero a este xornal. A estimación da Xunta da Galiza marcou esta mesma semana a demanda no país en 2.000 transportistas profesionais, sumando o sector de mercadorías ao que traballa con viaxeiras e viaxeiros. Desde Apetamcor engaden que a media do sector supera os 50 anos e agardan que se xubilen, nos próximos cinco anos, 1.200 só na demarcadción de Ourense. “Non se trata só de ter un carné, falta persoal con cualificación e ter pasado os exames regulamentarios para obter todos os permisos da Unión Europea (UE)”, clarifica a responsábel de Apetamcor. As empresas, están agora mesmo, “parcheando” esta situación. Desde esta entidade de transportistas indican que levan anos acudindo a persoal doutros países mais a demanda aumentou e xa non contan coa “canteira” de condutoras e condutores de Portugal, Italia “Agora estamos a traer persoal desde Perú e incorporamos dese país este mesmo ano 200 condutores”, sinala Otero, “contan con todas as garantías para a profesión, a súa orografía é moi semellante á nosa e temos boas referencias como para confiarlles vehículos que poden valer 200.000 euros e unha carga dese mesmo valor”, engade. Piquetes informativos en polígonos polo paro no transporte, que secundan centos de camioneiros galegos En relación a este tema, Otero lembra que o problema da falta de persoal agravouse coa entrada do Estado español na UE e a adaptación á normativa europea. “Nos países de Europa en xeral, e nos da UE en particular, sempre houbo preocupación pola formación e teñen escolas de transporte desde fai máis de 60 anos nas que obteñen todos os carnés e fan prácticas nas empresas que teñen así a súa canteira”, relata a responsábel de Apetamcor, “pola contra aquí non se crearon nunca e dependemos das autoescolas e dun proceso longo e caro”, comparte. Por este motivo, outra das demandas urxentes sería a creación de centros de capacitación semellantes aos que xa existen en Europa. Incorporación da muller Un dos retos máis importantes do transporte de mercadorías na Galiza, como recoñecen desde Apetamcor, é a incorporación da muller ao sector. “Precisamos que se adapten, por exemplo, as zonas de aparcadoiro que agoar mesmo non son seguras", demandan desde esta entidade, "o reto tamén é poder adaptar os horarios para a conciliación e, neste caso, poder contar con que fagan traxectos de menos distanncia para que non teñan que pasar días fóra". O sector galego do transporte non garante o abastecemento no Nadal Porén, desde esta entidade confían en que, co tempo, algunhas destas eivas teñan arranxo. "É unha profesión moi bonita e de futuro que pode ser unha fonte importante de emprego no noso país", asegura. Sobre algunhas destas cuestións xa teñen mantido reunións coa Xunta mais sen compromisos concretos. A necesaria modernización da frota de vehículos Un dos retos que tivo por diante o transporte de mercadorías na Galiza foi a súa modernización. "Soubemos adaptarnos, ademais de polo tema medioambiental, para ter menos repercusión económica nas reparacións e nos recambios", explica Myriam Otero. "Neste último caso, o aforro pode chegar a ser de 30%", engade. Os investimentos que tiveron que realizar estes últimos anos na adquisición de novos vehículos tamén pasaron ás cargadoras que, á súa vez, trasladaron este aumento. "Mais, hai que ter en conta que no prezo final do produto o transporte é só 0,2% do que paga o consumidor", indica Otero, que pon como exemplo a venda de auga mineral galega en Murcia. "Se o transporte influíra moito non se trasladaría até alí". Menos contaminantes A responsábel de Apetamcor indica a Nós Diario que os novos vehículos veñen adaptados para contaminar menos. "Creo que contribuímos á sostibilidade do medio ambiente e agora xa contamos con adiantos para emitir menos dióxido de carbono", considera a responsábel deste entidade, "algo que, polo de agora non é viábel noutros sectores, como é o marítimo ou no ferroviario que apenas chega a ser un 6% de todo o transporte".