O Bloque Nacionalista Galego rexistrou esta segunda feira no Congreso novas iniciativas para que Renfe “repoña todos os servizos ferroviarios suprimidos durante a pandemia que aínda continúan sen reactivar, como os trens nocturnos que conectaban a Galiza con Madrid e Catalunya”.
A organización nacionalista exixe apostar decididamente polo ferrocarril como medio de transporte “sustentábel” e que o Estado incremente os servizos de media distancia na Galiza, a destacar a conexión Vigo (estación de Guixar)-Pontevedra, Vilagarcía de Arousa e Santiago e mesmo a conexión entre Lugo e A Coruña ou Ourense.
O deputado do BNG no Congreso, Néstor Rego, definiu estas iniciativas como a “folla de ruta defendida tamén durante a pasada lexislatura e que reafirma o compromiso do Bloque para o desenvolvemento dunha política de mobilidade e transporte máis verde, eficiente e sustentábel”.
Demandas que, ademais de seren formuladas polo BNG, tamén son “reclamacións de asociacións do ferrocarril de media distancia, de usuarios e usuarias e demais”.
“Cada vez que se abre o debate, o Ministerio alega a existencia “alternativa” das conexións diúrnas de AVE e Alvia cando estamos a falar de servizos cunhas características diferentes” recrimina o deputado do BNG na Cámara baixa. De facto, segundo explica Rego, “non todo pode ser AVE, existe tamén o tren convencional que convén impulsar e recuperar”.
Trens nocturnos
Sobre o servizo de Tren-hotel que unía a Galiza con Barcelona e Madrid, Portugal e Francia, Rego asegurou que "a falta de interese do Ministerio por recuperar estes servizos demostra que se aproveitou o confinamento para eliminar estas conexións de maneira definitiva".
