A deputada do BNG Olalla Rodil pediu onte explicacións ao Goberno galego após a imputación de oito directivos da CRTVG, incluído o seu director Xeral, Alfonso Sánchez Izquierdo por "un presunto delito de acoso laboral" contra unha traballadora, caso que avanzara Nós Diario. Para a nacionalista, esta circunstancia resulta "inadmisíbel" en calquera empresa e moito máis "nunha pública".
Porén, engadiu, este non é o único caso e a "dirección que o PP puxo a dedo na CRTVG acumula centos de condenas por violar os dereitos das traballadoras e traballadores dos medios públicos nunha actuación sistemática e sistematizada contra quen se nega a manipular". Que máis ten que pasar para que o PP cese esta dirección?", preguntou.
Rodil manifestou que a televisión pública acumula 18 condenas nun ano "por vulneración de dereitos e despidos improcedentes" e que o número sobe a 400 desde 2009. O vicepresidente primeiro da Xunta da Galia, Diego Calvo, acusou o BNG de “atacar os medios públicos” para procurar “protagonismo” ante a proximidade dunhas eleccións, e criticou o nacionalismo por “desprestixiar” os profesionais da CRTVG. “Os únicos que atacan os medios públicos e os seus traballadores son vostedes”, respondeulle Rodil.
O PP, subliñou Rodil puxo "a dedo e mantén no cargo" ao director Sánchez Izquierdo en contra do que di a propia lei e polo tanto, é responsable directo da situación da CRTVG e que máis ten que pasar para que o PP cese ao director xeral da Corporación da Radio Televisión da Galiza.
Contrato de Javier Negre
O deputado do PSdeG Pablo Arangüena volveu preguntar na Cámara polos tres contratos "a dedo" por importe de 50.000 euros "regalados" pola Xunta ao xornalista "ultra" Javier Negre. "É un escándalo que Presidencia siga a negarse a informar sobre este asunto e a cumprir co acordo parlamentario”, criticou.