Máis de 182.900 galegos e galegas, 86% maiores de 65 anos, viven en condicións de pobreza severa

Até 485.000 persoas residentes na Galiza son pobres. Segundo os datos achegados no informe O Estado da pobreza na Galiza, elaborado pola Rede Europea de Loita contra a Pobreza e a Exclusión Social na Galiza (EAPN-Galiza), con datos de 2022 e presentado na xornada de onte, a taxa de pobreza no país afecta 18% da poboación. Neste sentido, o relatorio sinala que nesta situación atópanse arredor de 261.000 mulleres e 224.000 homes. EAPN-Galiza indica que “a taxa de pobreza máis elevada en 2022 é das persoas menores de 18 anos (23,3%), é dicir, nos nenos, nenas e adolescentes”. Porén, destaca “que este grupo de idade foi dos que experimentou un maior descenso nesta taxa, caendo 6,3 puntos, é dicir, reducíndose en 23,2%”. Nesta dirección, aseguran que “as persoas que viven en fogares con menores economicamente dependentes rexistran taxas moito máis elevadas que o resto para os principais indicadores de pobreza e vulnerabilidade”. A taxa de pobreza incrementou en 6,4% para as persoas maiores de 65 anos, até o punto de incluír 20% deste colectivo. Neste sentido, desde EAPN-Galiza apuntan que “no caso das persoas maiores, tras analizar os datos, hai que destacar que o comportamento da taxa de pobreza é algo diferente”. A este respecto, afirma que “como se explicou en informes anteriores, os seus ingresos están fortemente determinados polo importe da pensión que reciben, que é relativamente constante e, por tanto, a súa taxa de pobreza específica é máis dependente das modificacións do limiar que dos seus propios ingresos”. Oito de cada dez persoas en risco de pobreza non reciben ningunha prestación, alerta un estudo Fenda de xénero O relatorio de EAPN-Galiza volve certificar a feminización da pobreza. Neste punto, significa que “ao longo da serie histórica, podemos ver que a taxa de pobreza entre as mulleres nunca foi inferior á dos homes”. Asemade revela, que “a fenda de xénero segue a ser de 1,6 puntos”, situándose en 18,7%, é dicir, 2,2 puntos menos que no exercicio de 2021. Nesta liña, o informe explica esta caída como consecuencia das políticas públicas aplicadas desde as diversas Administracións, moi particularmente polo Goberno do Estado, cuxos resultados percíbense naqueles sectores nunha situación económica máis complicada. A pobreza severa 182.951 galegos e galegas atópanse en pobreza severa. Segundo EAPN-Galiza, nesta categoría inclúense aquelas persoas que viven en fogares cuxos ingresos por unidade de consumo son inferiores en 40% da media da renda estatal, unha cifra notabelmente inferior á empregada para definir o risco de pobreza e, por tanto, o indicador agrupa persoas que están nunha situación límite. Neste sentido, o limiar de renda utilizado en 2022 para considerar que un fogar está en pobreza severa é de 560 euros por unidade de consumo ao mes. A pobreza severa representa o elo máis débil dunha sociedade e tamén o máis agochado. As persoas nesta situación viven moito peor que o conxunto da poboación, a súa principal dificultade é resolver a exixencia permanente de escoller, de facer unha gradación entre necesidades indispensábeis, teñen maiores dificultades para facer fronte a calquera evento negativo e, se sucede, provócalles consecuencias máis graves e resúltalles moi difícil escapar por si mesmas desa situación. A este respecto, economistas como Vicent Navarro sinalan que “as recuperacións como consecuencias das mudanzas no ciclo económico chegan ao final ou simplemente non chegan ás persoas en pobreza severa porque a súa precariedade debilita, tamén, o seu poder de reclamar dereitos”. As comarcas do sur da Galiza rexistran as taxas de pobreza máis altas O informe O Estado da pobreza na Galiza revela que as taxas de pobreza severa son habitualmente superiores nas mulleres. Neste punto, sinala que “en 2002 reduciuse o seu valor tanto na taxa feminina, que chegou a 7,1%, como na masculina, con 6,4%, sendo o descenso de 1,9 entre as mulleres e de 2,2 entre os homes”. Aínda así, “ambos os datos sitúanse a niveles similares aos rexistrados en 2015, pero por riba dos de 2008”, como consecuencia dunha xestión da Grande Recesión de 2008 baseada na desvalorización interna, ao carecer os Estados da Unión Europa de competencias en política monetaria. Pobreza e idade A pobreza severa volve medrar un ano máis entre as persoas maiores de 65 anos. Nesta caso, en 2022 sobe en medio punto, pasando a afectar 6,3% deste colectivo, como resultado da contía das pensións. No mesmo sentido, “durante os tres últimos anos, a pobreza severa nas zonas rurais foi superior á das zonas urbanas. Para 2022, a taxa de pobreza na zona rural é de 8% é de 6,3% na urbana”. A isto, contribúe en boa medida a concentración nestas áreas da poboación máis envellecida, cunhas pensións, tamén, máis reducidas. As cifras de pobreza severa na Galiza responden a razóns de carácter estrutural. A este respecto, desde EAPN no Estado español afírmase que “non se trata dun fenómeno novo, pola contra avisa da consolidación dunha bolsa de pobreza estrutural formada por unha parte da poboación que estaba xa no abandono antes da pandemia”. Precisamente, para EAPN este “conxunto debuxa un panorama preocupante de consolidación” e reclama “completar sen máis atraso as medidas económicas e sociais de sostemento e protección”. O poder adquisitivo das pensións galegas caeu en 25% desde 2011 A poboación pensionista máis empobrecida do Estado vive na Galiza O informe O estado da pobreza na Galiza presentou onte a Rede Europea de Loita contra a Pobreza e a Exclusión Social na Galiza (EAPN-Galiza) vén confirmar as tendencias apuntadas en anteriores traballos. Neste sentido, confirma un proceso continuado de empobrecemento entre as persoas maiores de 65 anos, como consecuencia da perda de poder adquisitivo das súas pensións. A situación ten particular gravidade para este colectivo. Os datos de EAPN-Galiza destacan que 364.814 galegas e galegos reciben unha pensión cun importe inferior ao mínimo considerado para non ser pobre (721 euros ao mes), 47,4% do total”. Así, increméntase o número de persoas pobres neste grupo de idade en 8.515. A poboación pensionista rexistra un estado moi vulnerábel. Segundo se recolle no informe EAPN-Galiza, 158.038 pensionistas galegas e galegos, 19,8% do total, atópanse en situación de pobreza severa, salientando o relatorio que están "nesta situación 37,2% das prestacións de viuvez, recibidas maioritariamente por mulleres”. EAPN-Galiza considera que “estes datos revelan que a situación na Galiza é bastante peor que a nivel estatal (11,6 puntos peor), pois a media estatal estabelece que 35,8% do total de prestacións que reciben as persoas pensionistas atópanse por debaixo do limiar da pobreza. O dato da pobreza severa na Galiza tamén é o máis elevado nas comunidades autónomas xa que a nivel estatal se sitúa nun 14,7% do total das pensións percibidas en España”.