O Xulgado de Instrución número 11 de Sevilla acordou o arquivo das actuacións incoadas respecto ao caso de Álvaro Prieto, o mozo cordobés de raíces galegas de 18 anos de idade falecido o pasado 12 de outubro, electrocutado ao tocar unha catenaria ferroviaria mentres estaba entre dous vagóns dun tren na zona de talleres da estación sevillana de Santa Xusta, segundo veñen de informar fontes do Tribunal Superior de Xustiza de Andalucía. Nun auto datado o pasado día 19 de decembro, o Xulgado conclúe que do resultado das dilixencias de instrución practicadas "non existen indicios da comisión de ilícito penal algún e no que interviñesen de forma intencionada ou imprudente terceiros no falecemento" do mozo.
A mañá daquel 12 de outubro, Álvaro Prieto perdeu o tren AVE para o cal comprara billete co obxectivo de regresar desde Sevilla a Córdoba tras pasar unha noite de lecer na capital andaluza, tras o que tentou acceder a outro tren posterior para o que carecía de billete, sendo iso impedido polo persoal da estación. A continuación, o rapaz visitaría o punto de atención ao cliente de Renfe da estación, onde segundo o delegado do Goberno estatal en Andalucía, Pedro Fernández, foille ofrecido recargar o seu teléfono móbil, que carecía xa de batería, para contactar de novo coa súa familia ao obxecto de solucionar a situación ou comprar outro billete. Mais o mozo non accedería e marcharía do recinto polo acceso correspondente á avenida de Kansas City.
A partir de aí, segundo precisaba a Policía Nacional a raíz dunhas imaxes de vídeo incorporadas á investigación e vistas tras a localización do seu cadáver, o mozo accedería sen autorización á zona de talleres da estación —nun segundo intento tras un primeiro frustrado polo persoal do centro— e subiu á parte superior dun tren estacionado "pola intersección entre os dous vagóns".
Unha vez sobre o tren, segundo a Policía Nacional, o mozo caería "instantaneamente fulminado" ao oco comprendido entre dous vagóns, ao entrar en contacto coa catenaria e ser electrocutado. O citado tren estaba inmobilizado na zona de talleres desde o mes de agosto. O seu cadáver foi achado o 16 de outubro, catro días despois destes feitos, ao ser gravado por un cámara de televisión que traballaba para unha emisión en directo de TVE, ao discorrer diante da cámara o citado tren, que naqueles momentos estaba a ser mobilizado para a súa revisión.
Neste sentido, o Xulgado de Instrución número 11 fai referencia no seu auto ás distintas dilixencias practicadas, como o levantamento xudicial do cadáver, a inspección ocular, a toma de mostras e vestixios por parte da Policía Científica, a práctica da autopsia, a recollida das gravacións das cámaras de seguridade da estación e de estabelecementos próximos ao lugar, e a toma de declaración de testemuñas.
Así, e en relación coas devanditas dilixencias, o Xulgado de Instrución número 11 de Sevilla constata que recibiu recentemente o informe de autopsia do cadáver do mozo, que conclúe que se tratou dunha morte accidental por electrocución.
O Xulgado precisa que o mozo faleceu o mesmo día da súa desaparición o día 12 de outubro, tal e como se constata dos informes dos médicos forenses no levantamento do cadáver e na autopsia, do contido dos atestados da Policía Nacional e do visionado das cámaras de gravación solicitadas do estabelecemento próximo ao lugar onde foi atopado o cadáver o día 16 de outubro. Por todo iso, e ao "non existir indicios da perpetración de feito delituoso algún", o Xulgado acorda o arquivo das actuacións.
