A Xunta da Galiza, seguindo criterios técnicos, emitirá esta segunda feira unha instrución que se fará efectiva a vindeira terza, día 30, para que o uso xeral da máscara deixe de ser obrigatorio nos centros sanitarios, limitando o seu uso aos servizos de urxencias, aos PACs e aos servizos nos que haxa pacientes inmunodeprimidos.
Así o anunciou este domingo o conselleiro de Sanidade, Julio García Comesaña, na súa visita ao Punto de Atención Continuada do Val Miñor, no concello de Nigrán.
Tal e como recolle o último informe da vixilancia da gripe en Galicia referido á semana que rematou o 21 de xaneiro, e que periodicamente elaboran os técnicos da Dirección Xeral de Saúde Pública da Consellaría de Sanidade, o nivel de intensidade desta patoloxía é baixo.
Segundo apunta o Sergas nun comunicado, a taxa de consulta en Atención Primaria no conxunto da Galiz diminuíu un 47% con respecto á semana anterior, un descenso que afecta ao conxunto do territorio.
O informe do persoal experto de Saúde Pública tamén reflicte que a taxa de consulta diminuíu en todos os grupos de idade.
Gripe
Polo que atinxe á positividade das mostras estudadas, situouse na contorna de 10%, o que supón un claro descenso con respecto á semana anterior, que era de 20,1%.
Neste último informe sinálase que, na semana que rematou o 21 de xaneiro, notificouse o ingreso de 103 persoas por gripe, o que representa un 63% menos que a semana previa.
No que vai de temporada de gripe, notificáronse 3.071 ingresos e deles un total de 161 estiveron na UCI.
Covid
Polo que se refire á Covid, o número de casos activos é de 508, dos que sete están na UCI e 113 en unidades de hospitalización.
