Agora

O equipo de As neves, primeira longametraxe da directora e guionista viguesa Sonia Méndez, compartiu hoxe co público da Fonsagrada a preestrea do filme, que foi rodado en diferentes localizacións do municipio, así como noutros concellos veciños e en Santiago de Compostela. O filme, protagonizado por un elenco maioritariamente novel, conta a historia dun grupo de adolescentes nunha localidade do interior a raíz da desaparición dunha das amigas durante a celebración do Entroido. O filme estreouse no Festival de Málaga e poderá verse nos cinemas a partir do 10 de maio. As neves é a primeira experiencia de Sonia Méndez como directora e guionista dunha longametraxe de ficción, se ben conta cunha recoñecida traxectoria de máis de vinte anos no sector audiovisual.

A Vicepresidencia da Deputación de Lugo e o Leite Río Breogán da Liga ACB de baloncesto colaboran, un ano máis, coa Axencia Galega de Doazón de Órganos e Sangue (ADOS) na promoción da doazón. O vicepresidente da Deputación de Lugo, Efrén Castro; o director xeral da escuadra lucense, Tito Díaz; e a directora de ADOS, Marisa López, presentaron esta quinta feira unha campaña que se vén repetindo desde 2017 e que busca "sensibilizar sobre a importancia deste acto altruísta".
 

Os almorzos organizados polo Foro Económico da Galiza tiveron esta quinta feira como convidada a portavoz nacional do BNG, Ana Pontón, nun acto no que estiveron presentes membros desta egtidade, co seu director, Santiago Lago; á fronte. No almorzo foron abordadosdiversos asuntos que están na axenda parlamentaria da lexislatura que vén de comezar. A portavoz do BNG falou de tecnoloxía, da necesidade de atraer inversión á Galicia, da transición enerxética, do modelo de financiación autonómica e, de xeito especial da situación do tecido industrial de Galiza. Durante case as dúas horas do almorzo, tamén foi abordado o futuro do proxecto de Altri , así como o sector forestal como eido estratéxico para o desenvolvemento e dinamización do rural. Tamén os participantes abordaron a necesidade de incrementar os fondos para investigación nas Universidades galegas e como potenciar as relacións das universidades e co tecido empresarial.

A Garda Civil realizou unha inspección de 23 locais de tatuaxe, micropigmentación e piercing na provincia da Coruña no marco da operación Ospyl pola importación de produtos nos que se eluden os trámites aduaneiros, a cal se saldou con dous investigados e diversas incautacións de miles de agullas e tintas, así como de drogas.  Isto operativo foi desenvolto pola Patrulla Fiscal e Fronteiras da Coruña (Pafif) en colaboración co Destacamento de Fiscal e Fronteiras do Porto da Coruña. A investigación iniciouse o pasado 5 de febreiro ao ter coñecemento destas importacións ilegais. Segundo informa a Garda Civil nun comunicado, houbo inspeccións en estaeblecementos nos concellos da Coruña, Arteixo, Oleiros, Culleredo, Betanzos, Sada e Miño. Así, prodúcense 19 infraccións á normativa de contrabando, 33 infraccións á normativa sanitaria, 11 infraccións á normativa tributaria e laboral, 14 infraccións á normativa de protección de datos e consumo, así como oito infraccións á normativa de seguridade cidadá e estranxeiría.

Dúas persoas tiveron que ser excarceradas e logo evacuadas a un hospital tras chocar o coche no que viaxaban con outros turismos estacionados en Ourense, segundo informou o CIAE 112 Galiza. Os feitos ocorreron sobre as 20 horas desta cuarta feira, e foi un particular que presenciou o ocorrido o que avisou a Emerxencias. O accidente tivo lugar na rúa Díaz da Banda, onde un turismo chocou contra varios vehículos aparcados. A testemuña que avisou ao 112 sinalou que podía haber varias persoas atrapadas no interior dun dos coches implicados.

Anthony Albanese, primeiro ministro progresista de Australia, subliñou a cuarta feira que padecen unha “crise nacional” polo “flaxelo” da violencia machista, tras as protestas neste sentido en múltiples cidades. 28 mulleres foron asasinadas ao longo de 2024, o dobre que no mesmo período de 2023. Albanese anunciou un programa de apoio para mulleres que escapan de situacións de violencia e outro para combater as falsificacións pornográficas.

Aos seus 37 anos, a futbolista galega Vero Boquete continúa facendo historia. A futbolista galega vén de ser determinante para que o seu actual club, a Fiorentina italiana, fechase a súa clasificación para a Champions League. Nun encontro que enfrontou o cadro viola co nerazzurro do Inter de Milán durante a xornada de hoxe, un tanto de Boquete no minuto 95 de partido serviu para subir ao marcador o 2-2 definitivo e fechar, así, a presenza da Fiorentina na próxima edición da máxima edición continental. Agora, os próximos desafíos que deberá afrontar a compostelá serán as dúas datas restantes da Serie 'A' do Calcio e a finalísima da Copa de Italia.

A Facultade de Ciencias da Educación e Traballo Social de Ourense, pertencente á Universidade de Vigo (Uvigo), levará a cabo no día de mañá, 2 de maio, unha xornada na que se darán a man deporte e solidariedade. Baixo o título 'Inclusión e deporte: o deporte como chave para intervir socialmente', a actividade estruturarase en dúas partes. A primeira será un faladoiro onde se exporán as boas prácticas de cada unha das persoas conferenciantes -todas elas educadoras sociais-, mentres que na segunda desenvolveranse obradoiros prácticos relacionados co manexo e comunicación coas familias e a xestión de grupos. Deste modo, a actividade, gratuíta e aberta a persoas non matriculadas na Uvigo co obxectivo, segundo explican desde a organización, de "achegar unha proposta nun ámbito moi pouco coñecido", abrirá coa palestra de Natalia Gómez, adestradora do Club Ximnasia Pavillón de Ourense. Inmediatamente despois collerá a remuda Millán Brea, coordinador da Área Social do Club Ourense Baloncesto (COB), ao que seguirán a educadora social Ana Sagredo e María Acosta, estudante de Educación Social e membro da Asociación Universitaria de Ciencias da Educación (AUCE). Finalmente, o encargado de baixar o pano será Cristian González, experto no mundo dos eSports.

A factoría viguesa do grupo automobilístico Stellantis deterá parte da súa produción na quenda de noite desta cuarta feira, 1 de maio, por falta de pezas necesarias para a fabricación dos seus vehículos. Tal como informou a compañía ao cadro de persoal, por causas de forza maior, debido a problemas de aprovisionamento, suspenderase a actividade da quenda de noite no Sistema 1 da planta de Balaídos, que ensambla os Peugeot 2008. Esta parada únese ás anterior ocasións nas que a fábrica de Vigo viuse obrigada a suspender os seus traballos por problemas similares nos últimos meses.

Nos primeiros catro meses de 2024 as autoridades brasileiras notificaron 4,12 millóns de casos probábeis de dengue, cunha incidencia de máis de 2.000 casos por cada 100.000 habitantes, e confirmaron máis de 1.900 falecementos, con outros 2.345 baixo investigación, recolleron a terza feira medios internacionais. A expansión do dengue pola rexión levou Guatemala a declarar a emerxencia sanitaria para tratar de conter a doenza.

A concelleira de Festas de Compostela, Pilar Lueiro, e a deseñadora do cartaz, Minia Banet, presentaron onte o programa das Festas da Ascensión -que decorrerán desde o 8 de maio até o domingo 12-, ateigado de concertos e actuacións para todos os gustos, monicreques, drons e eventos deportivos, sen esquecer a vertente tradicional, con citas como a comparsa de Cabezudos, o Torneo da Chave ou os Cantos de Taberna. A orquesta Panorama, Fillas de Casandra ou Billie Marten son algunhas das actuacións destacadas así como o concerto dos 40 e o Composfest que traerá a artistas locais como Dios Ke Te Crew ou Boyanka Kostova. O Recinto Feiral de Amio acollerá a Festa das Persoas Maiores o sábado 11, e a popular Feira Cabalar durante a xornada do día da Ascensión. 

O Celta anunciou esta terza feira que chegou a un acordo con Rafa Benítez para a súa desvinculación da entidade celeste. Foi a través dun comunicado que fixo público nas súas redes sociais o club que preside Marián Mouriño. O técnico madrileño fora destituído o pasado 13 de marzo despois de oito meses no cargo na tempada do centenario da entidade galega. O club expresou o seu "máis sincero agradecemento pola implicación, honestidade e profesionalidade" que mostraron Benítez e o seu corpo técnico, cun "incansábel traballo desde a súa chegada". Ambas as dúas partes tiñan como data límite para resolver este asunto o 30 de xuño, durante a xornada en que conclúe de maneira oficial a tempada.

Unha operación antidroga aberta nas Rías Baixas detivo polo menos a 15 persoas pola distribución de estupefacientes en distintos puntos do Estado. Nesta operación participan o Equipo de Crime Organizado (ECO) da Garda Civil de Pontevedra, dependente da UCO. A operación está en marcha e vaise a prolongar durante toda a xornada. Así, fixéronse rexistros fundamentalmente en vivendas nos concellos de Vilagarcía, Vilanova de Arousa, Cambados e Arcade, así como en Madrid.

As licenzas concedidas para a construción de edificios en xaneiro deste ano foron 129 na Galiza, o que supón seis menos que un ano antes (-4,4%), segundo os datos publicados polo Instituto Galego de Estatística (IGE). Con estas licenzas crearanse un total de 122 vivendas, neste caso 15 menos en comparación co mes de xaneiro de 2023 (-10,9%). Mentres, os permisos para rehabilitacións ascenden a 148 edificios, cinco máis (+3,5%) en comparativa interanual. Así, rehabilitaranse 74 edificios, polo que se disparan neste caso un 61%.

O pasado 28 de abril morreu en Compostela a poeta Luz Fandiño, todo un símbolo para distintas xeracións de creadores literarios e o activismo social de esquerdas na cidade. Esta segunda feira, 29 de abril, celebrouse no cemiterio de Boisaca un sinxelo acto de despedida para os máis achgeados. O vindeiro domingo 5 de maio, terá lugar, ás 17 horas, no Auditorio do Museo do Pobo Galego, un acto de celebración popular da súa vida. 

A terza feira comeza en todo o Estado español a segunda edición da iniciativa Cine Sénior, que permite ás persoas maiores de 65 anos asistir ao cinema pagando unha entrada de dous euros. O programa, que conta cun orzamento de 12 millóns de euros, está orientado a que un día a semana, de forma preferente as terzas feiras, este grupo poida adquirir unha entrada reducida en 420 cinemas. A diferenza da primeira edición, as entradas poderanse mercar por vía dixital, amais de nos propios estabelecementos.

Na primeira edición, na que tamén participaron 420 cinemas, só 28 locais gastaron de forma íntegra a axuda, polo que o titular español de Cultura, Ernest Urtasun, detallou que redistribuíron os recursos nesta ocasión para que as salas con máis afluencia incrementen a súa dotación, anunciando un fondo de reserva de case dous millóns de euros “para que non se esgote o crédito”.

O seu predecesor, Miquel Iceta, explicara que este grupo foi elixido posto que entre 2021 e 2022 só 6% das persoas maiores de 65 anos asistiu ao cinema, cando antes da pandemia de Covid-19 era “parte esencial” do público. En cambio, até 49% da poboación entre 20 e 24 anos fora como mínimo nunha ocasión ás salas de cinema.

A Sala do Contencioso-Administrativo do Tribunal Superior de Xustiza da Galiza aceptou o recurso dunha persoa que produce mel para autoconsumo e condenou á Consellaría de Medio Ambiente da Xunta a pagarlle 1.793 euros, transcendeu a segunda feira. A institución, que admitiu que os danos foron provocados por un oso pardo, denegara en primeira instancia a axuda aducindo que a persoa afectada non tiña numeradas e identificadas individualmente as súas colmeas. Así e todo, a sentenza recolle que “ningún dos servizos veterinarios que coñeceron da instalación” lle comunicou este apartado, sinalando que ao tratarse dun particular non ten por que "ter un coñecemento profundo" da normativa.

Ao Celta saíulle outro problema económico máis cando aínda está sen fechar a saída de Rafa Benítez. O club terá que pagar unha indemnización ao Levante pola continuidade e Claudio Giráldez no club. A razón, segundo explica a Cadea Ser, é que o adestrador tiña xa un compromiso asinado coa entidade do País Valencià. O pasado 12 de marzo o Celta destituíu a Benítez tras perder ante o Real Madrid e nomeou Giráldez como adestrador até o 30 de xuño. Días despois, a presidenta do Celta anunciou a súa renovación até xuño de 2025. 

Despois de que desde o 9 de febreiro distintos bloqueos por parte de agricultoras e agricultores polacos obstaculizaran a entrada de produtos ucraínos entre demandas para que a Unión Europea (UE) vetase o ingreso das mercadorías alimentarias de Kíiv, Ucraína confirmou a segunda feira que o último cruce fronteirizo bloqueado foi liberado logo das negociacións con Polonia. Así e todo, as restricións manteranse a algúns camións que transporten gran.

A empresa chinesa ByteDance, propietaria de TikTok, corroborou a sexta feira que non ten ningunha intención de vender a rede social a unha compañía occidental, como exixe unha lexislación aprobada polos Estados Unidos, que no caso contrario a prohibirá en seis meses. A declaración produciuse en resposta ás especulacións sobre que estaría a explorar opcións para vendela mais excluíndo o algoritmo detrás da aplicación.