Judith Rodríguez, sétima na Copa do Mundo de Esgrima de Tailandia

Finalizou o percorrido da galega Judith Rodríguez na Copa do Mundo de Esgrima en Cadeira de Rodas que se está desenvolvendo na localidade tailandesa de Nakon Ratchasima. Após asinar un brillante percorrido que a levou até a rolda de cuartos de final, non foi quen de entrar na pelexa polas medallas logo de perder cunha deportista que xogaba co factor campo ao seu favor, Aphinya Thongdaeng. Sétima na clasificación xeral do campionato, con este resultado a tiradora -que o pasado ano 2022 tornou na primeira non só a nivel da Galiza, senón do conxunto do Estado, en lograr unha medalla de ouro nunha proba da Copa do Mundo- finalizará o 2023 no cuarto lugar do ránking da Federación Internacional de Deportistas en Cadeira de Rodas e Amputados.