A empresa de reforzo da recollida do lixo na cidade da Coruña, Valoriza, recolleu un total de 125 toneladas desde a posta en marcha dos labores de emerxencia para retirar os residuos acumulados nas rúas derivados da folga no servizo impulsada polo Sindicato da Limpeza.
Diso informou o Concello nun comunicado, no que explica que hai unha comisión de seguimento da emerxencia sanitaria composta pola alcaldesa, Inés Rei, Yoya Neira, Montserrat Paz e José Manuel Laxe, ademais de técnicos municipais das diferentes áreas.
A comisión fixo seguimento este sábado do estado actual da recollida, dos actos vandálicos e do funcionamento da empresa contratada de emerxencia que levou a cabo esta sexta feira a súa segunda xornada de traballo.
Na súa segunda xornada a pé de rúa, a empresa de emerxencia que reforza a recollida de residuos na cidade recolleu un total de 70 toneladas de lixo, sen incidencias. Con esta cifra, os operarios de Valoriza xa recolleron un total de 125 toneladas de lixo, atendendo tamén o cómputo total correspondente á quinta feira.
En canto ás incidencias, na quenda de noite rexistráronse un total de seis incidencias asociadas a queima de contedores. Neste sentido, o servizo municipal de Bombeiros notificou intervencións en colectores situados en varias zonas da cidade.
En concreto, na rúa Marconi, na travesía de San José, na rúa da Torre -neste caso, cunha árbore afectada-, na rúa Antón Vilar Ponte e na Rafael Dieste. Ademais, contabilizouse outro contedor afectado no Canellón García, no barrio de Monte Alto, mais sen que fose necesaria a intervención dos bombeiros.
O Concello da Coruña sinalou que, do mesmo modo que na xornada anterior, a sexta feira, estaba convocada unha nova xornada de folga no servizo de recollida de lixo. Segundo a concesionaria, Prezero, ningún traballador a secundou.
Con todo, desde o Goberno municipal da Coruña sinalan que as porcentaxes recollidas polo persoal da concesionaria foron, de novo, moi baixos, e van desde o 100% só na zona Peixaría-Centro, ao 5% nas Roseiras-Labañou.
