En liberdade con cargos un home detido en Monforte por agredir a unha muller e un técnico do 061
O Xulgado de Instrución número 1 de Monforte de Lemos decretou esta segunda feira a posta en liberdade con medidas cautelares dun home detido o sábado no municipio por ferir presuntamente unha muller na man na rúa e agredir despois a un técnico do 061 que acudiu ao lugar para atender a vítima. Os feitos que conduciron á detención do investigado tiveron lugar a tarde do sábado nunha céntrica rúa da localidade, onde se produciu unha forte discusión entre o home e a muller que levou os veciños presentes nese momento na vía pública a chamar aos servizos de emerxencias.
