Un operario resultou ferido no aeroporto de Alvedro, na Coruña, cando participaba nas tarefas de asistencia en terra dunha aeronave. Segundo informaron fontes citadas pola axencia Europa Press, o suceso tivo lugar ás 20 horas deste domingo e o traballador pertence á empresa South Europe Ground Service.
O home, que participaba nas tarefas de atención ao avión, recibiu auxilio médico no lugar dos feitos e, posteriormente, foi trasladado ao hospital. Outras fontes sinalaron que foi intervido cirurxicamente debido á amputación dun membro inferior e que permanece na unidade de reanimación do Chuac con prognóstico grave.
O accidente está baixo investigación da Garda Civil, que se fixo cargo do caso nas últimas horas para tratar de esclarecer os motivos polos que se produciu.
