Unha ABAU sen adaptar para o alumnado con autismo

Malia aos anuncios da Consellería de Política Social e Xuventude de supostos avances "extraordinarios" en favor das persoas con Trastornos do Espectro Autista, o día a día das familias afectadas amosa unha loita continua e permanente para garantir os dereitos máis básicos dos seus fillos e fillas. Estes días nos que son noticia as notas de corte e o acceso ás diferentes carreiras universitarias, quedan no esquecemento outros temas difíciles de xustificar no sistema educativo galego que, segundo a conselleira Fabiola García, sería dos máis inclusivos do Estado español. Moitas persoas quedan co dato de 96% de alumnado aprobado na ABAU sen reparar que 8,8% non chega nin a completar o título da ESO e arredor dun 58% rematan a súa formación cunha titulación inferior a un FP superior. As familias reclaman formación para as docentes e apoio para alcanzar un ensino integrador As desigualdades que sofren os nenos e nenas das zonas rurais galegas non deixaron de incrementarse nos últimos anos coa supresión de colexios, unidades educativas ou servizos esenciais como rutas de transporte. Cando rematan a educación secundaria obrigatoria, miles de rapaces e rapazas das zonas rurais non teñen ningún autobús ou transporte público que lles permita asistir aos seus centros educativos. A Tarxeta Xente Nova é unha tarxeta de transporte que permite aos menores de 21 anos realizar de xeito gratuíto as viaxes interurbanas e urbanas, cando formen parte dunha viaxe metropolitana. Mais a realidade das liñas de trasporte de autobús en Galicia é tan desastrosa que son maioría as localidades nas que resulta imposible dispor de autobuses, en horarios e frecuencia necesarios, para asistir aos centros educativos. Cada curso escolar a Xunta suprime rutas de transporte, o que afecta a multitude de rapaces e rapazas do rural. Resulta máis fácil ir coa subvención da Xunta de botellón nun autobús a unha cidade que ir a un centro educativo nas zonas rurais. Os institutos das zonas rurais carecen de multitude de materias optativas e a oferta educativa é moi inferior á de localidades máis poboadas, o que resulta tamén discriminatorio para a rapazada do rural. Porén, as carencias e os problemas multiplícanse para os nenos e as nenas que teñen diversidade funcional. Exames adaptados Son moi poucos os nenos e nenas con Asperger, por exemplo, que acaban o bacharelato e moitos menos os que conseguen superar a ABAU e acceder á universidade ou á formación precisa para ter un emprego. Mesmo nesta última convocatoria das probas da ABAU a Comisión Interuniversitaria de Galicia (CIUG) negouse a facer as adaptacións indicadas polo Equipo de Orientación Específico da propia Xunta para alumnado con Asperger. Unha familia de Vilalba denunciou como a Xunta desoe as recomendacións dos seus propios técnicos malia a que o seu fillo realizou as probas no centro de recursos educativos da Once en Pontevedra, xunto con outros 14 rapaces con necesidades específicas de apoio educativo. O Equipo de Orientación Específico da Xunta, con especialistas en autismo e un informe psicopedagóxico do departamento de Orientación do instituto e outros de profesorado do alumno propoñían adaptacións necesarias como que o exame fose cerrado, sen opcións para escoller, ou que houbese unha axuda para elixir e, despois, retirar as probas descartadas; que as probas escritas estivesen só por unha cara, que cada pregunta fose nun folio e que se usasen termos claros e precisos nos enunciados, espazos amplos entre as preguntas e máis espazos para as respostas ou responder oralmente, polos seus problemas de psicomotricidade fina. A Xunta negouse a facer estas adaptacións básicas para un alumno con autismo, que si puido facer un exame nunha sala aparte, pero cun exame exactamente igual que o do resto de alumnado, impreso nun folio máis grande. Na parte oral nin sequera había a posibilidade de gravación, o que implicou que o alumno tivese que ditarlle a unha persoa, parando continuamente para que esta puidese copiar as respostas. A familia denunciaba, con razón, o incumprimento da lexislación da igualdade de oportunidades para os estudantes con autismo por parte da Xunta, e poñían o exemplo de que é como se a un alumno en cadeira de rodas o día da ABAU se lle quita a rampla de acceso. O autismo, que afecta arredor de 50.000 menores en idade escolar en todo o Estado, acaba sendo unha loita constante e sen tregua para estes nenos e nenas, e non pode ser que algunhas das principais trabas se encontren no ámbito da educación. As familias reclaman maior formación para as persoas docentes e o apoio para un ensino verdadeiramente integrador, como unhas probas de ABAU adaptadas para as alumnas e os alumnos con autismo.