A mobilización, convocada pola Asociación veciñal de Coruxo, a Asociación veciñal de San Miguel de Oia, a Plataforma pola Defensa da ría Vigo-Cíes, Amigas da Terra, Ecoloxistas en Acción e Greenpeace e apoiada por formacións políticas como o BNG, busca devolver a illa de Toralla ao uso público.
O proceso de apropiación e urbanización das máis de 10 hectáreas que conforman a illa de Toralla arrancou nos anos 60. Neste marco, destacou como exemplo da especulación na zona a autorización por parte do Concello de Vigo dunha edificación de 21 andares e 70 metros de altura que se pode ver desde calquera punto da ría.
Acceso prohibido
O acceso de vehículos e peóns á illa de Toralla continúa prohibida a día de hoxe mediante unha barreira e un vixiante ao final da ponte que bloquean o acceso e mesmo impiden a recuperación da zona de servidume do dominio público marítimo-terrestre.
A lexislación vixente recolle que calquera persoa pode chegar até a ribeira do mar a pé, mais a realidade é que aos visitantes á illa de Toralla só se lles permite acceder aos areais situados a ambos lados da ponte.
O voceiro de Ecoloxistas en Acción Cristobal López sinala a Nós Diario que “nin sequera se puido levar a cabo a senda peonil de tres metros de ancho ao redor da illa que en 2008 aprobou o Ministerio de Medio Ambiente”.
A apropiación da illa de Toralla
López destaca que “Toralla segue a ser un espazo público usurpado hai décadas para beneficio dunhas poucas persoas privilexiadas que deben ter moi bos contactos políticos para seguir aí tantos anos sen cumprir as leis”.
“Facemos un chamamento aos vigueses e viguesas para que se unan á reconquista de Toralla e ás administracións para que fagan cumprir a lei e devolvan a Vigo a illa” , conclúe López.
BNG
O voceiro do BNG no Concello de Vigo, Xavier Pérez Igrexas, que tamén participou da mobilización, afirmou que “a praia de Toralla siga sendo un couto privado VIP, incumprindo descaradamente a normativa de ordenación do litoral, é algo incomprensíbel en pleno 2024”
Igrexas indicou que “á falta de acción do Goberno local de Abel Caballero engádese á total complicidade da Xunta do PP e dos sucesivos Gobernos españois, permitindo que as viguesas e vigueses sigamos sen poder exercer o dereito a percorrer a illa”.
