Tempo de bonito e comidas fresquiñas

Ensalada rusa de pescada e kimchi Démoslle unha volta á ensalada rusa de toda a vida coa suavidade da pescada e co toque de cor e sabor do kimchi. Elaboración: Comezamos cocendo as patacas enteiras con monda, as cenorias, os ovos, os chícharos e a pescada. As patacas e a cenoria durante uns 25 minutos, a pescada 6 minutos e para os ovos e os chícharos uns 10-15 serán suficientes. Deixamos que arrefríen, pelámolos e cortámolos en taquiños. Ao peixe tirámoslle a pel e esfaragullámolo. A continuación mesturamos todos os ingredientes cocidos nun cunco amplo para poder remexelos facilmente e engadimos a maionesa e o kimchi. O kimchi ten un sabor bastante forte, cun par de culleres de sobremesa abondarán para darlle un ton vermello e un pouco de gosto pero podemos engadirlle máis se gostamos. Remexemos todo ben até integrar todos os ingredientes e deixamos na neveira repousar unhas 2 horas antes de comela. Servimos nun prato coa axuda dun aro de empratar, perexil picado por enriba e picos de pan para acompañar. Ingredientes (4 persoas): 2 cenorias 3 ovos 2 patacas medianas 300 g de pescada fresca 200 g de chícharos 210 ml de maionesa 2 culleres pequenas de kimchi picos de pan para acompañar Tataki de bonito con vinagreta Aproveitando que está de temporada o bonito, imos preparar uns lombos dun xeito fácil e cun sabor ben fresco grazas á vinagreta. Elaboración: En primeiro lugar cortamos a cebola e os pementos en cadrados ben finiños e mesturámolos nun cunco co vinagre, o aceite e un chisco de sal e tomiño seco. A proporción será de 3 partes de aceite por unha de vinagre. Deixamos repousar a vinagreta e mentres preparamos o bonito. Como vai ficar a medio cociñar polo medio o ideal é empregar bonito conxelado para evitar problemas cos anisakis. Cortamos o lombo en anacos alongados e algo grosos e cociñámolo nunha tixola cun chisco de aceite. É importante que a tixola estea moi quente antes de facer o peixe, e ímoslle dando a volta para marcalo ben polos lados pero evitando que se cociñe polo centro. Cando estea dourado por todos os lados servimos nun prato os lombos e botámoslle un chisco da vinagreta por enriba. Ingredientes (1 persoa): 250 g de bonito 1/2 cebola doce 1 pemento verde 1 pemento vermello vinagre de viño sal tomiño aceite de oliva Crema de banana Fixemos unha versión das clásicas natillas pero con banana. Unha sobremesa perfecta para aproveitar esta froita antes de que se estrague. Elaboración: Comezamos pelando e cortando as bananas en rodas. Nun cunco pequeno disolvemos a maicena na metade do leite para evitar que se formen bolos. A continuación botamos o resto do leite nunha pota e quentamos a lume baixo, engadimos o azucre e a vainilla e remexemos ben até que estean integrados. Cando teñamos o leite quente pero sen que chegue a ferver engadimos a outra metade coa maicena e remexemos constantemente a fogo baixo até que comece a espesar. Unha vez academos a textura desexada engadimos as rodas de banana e cun batedor trituramos todo até obter unha mestura suave e cremosa. Finalmente servimos en vasiños individuais e cubrimos por enriba cunha bolacha. Podemos decorar con anacos de banana tamén. Deixamos arrefriar na neveira un mínimo de 2 horas para que rematen de callar e servímolas ben frías. Ingredientes (4 racións): 500 ml de leite 3 culleres de maicena 100 g de azucre moreno 1 culler pequena de extracto de vainilla 4 bananas maduras bolachas para decorar