Xa case cheira a verán

—Coliflor asada con especias. Un aperitivo moi saudábel, saboroso e apto para todas. Elaboración: Comezamos lavando ben a coliflor e separando todas as ramiñas, dependendo de como queiramos presentalo podemos cortalas máis pequenas ou máis grandes. Por exemplo, para un aperitivo máis informal podemos cortalas pequeniñas e comelas directamente coas mans. Nun cunco á parte mesturamos todas as especias co zume do limón e 2 ou 3 culleres de aceite de oliva, remexemos todo ben até que se integre e imos pintando abundantemente cun pincel os anacos da coliflor. A continuación colocamos nunha bandexa para o forno e cociñamos durante 20 minutos a uns 180ºC. Servimos quentiñas. —Pastel de carne. Este prato é moi popular ao redor do mundo e ten numerosas versións, unha das máis coñecidas é a receita que se elabora no Reino Unido. Elaboración: En primeiro lugar imos preparar a carne, para isto cortamos a cebola en brunoise e sofritimos a lume baixo cun chisquiño de sal. A continuación engadimos o pemento tamén cortado en taquiños finos e seguimos pasando todo xunto outros 5 minutos. Despois engadimos a carne adobada con sal, pementa e os allos moi finiños. Deixamos que se doure un pouco mentres remexemos ben e incorporamos o vaso de viño. Cando se evapore, botamos o tomate e deixamos cociñar todo a lume moi baixo durante 20 ou 25 minutos. Esta é unha receita das que ten que facer “chup chup” a fogo lento. Mentres se cociña a carne, nunha pota con abundante auga salgada botamos as patacas enteiras e cocemos uns 20 minutos aproximadamente, cando piquemos as patacas cun coitelo e estean brandiñas podemos sacalas. Agardamos un pouco a que arrefríen, tirámoslles a monda e esmagámolas cun garfo. A continuación incorporamos a manteiga cortada en dadiños e mesturamos todo ben até que fique un puré homoxéneo. Cando teñamos as patacas e a carne preparados podemos pasar a montar o pastel. Colocamos unha primeira capa coa carne e a continuación cubrimos ben co puré de pataca. Pisamos cun garfo para que quede alisada a superficie e botámoslle o queixo relado por enriba. Para finalizar metemos no forno, que previamente quentamos a 180ºC, durante uns 10 minutos, e a continuación gratinamos outros 5 minutos. Servimos quente, pero deixamos repousar uns minutos antes de comelo para que se redistribúan os zumes e o pastel manteña a súa forma. —Torta de lima. Esta torta fresquiña e deliciosa faise en menos de media hora e con poucos ingredientes. É ideal para as sobremesas e merendas da primavera ou do verán. Elaboración: Para preparar a base da torta imos esmagar ben todas as bolachas, podemos facelo cunha picadora ou meténdoas todas nunha bolsa de plástico e pasándolles un rolete. Cando teñamos todas as bolachas feitas area, engadímoslle a manteiga derretida e mesturamos ben para facer unha masa homoxénea. Colocamos esta masa no fondo e nos bordos do molde cunha culler e metemos na neveira para que arrefríe un pouco. Mentres tanto, imos preparar o recheo da torta. Para isto mesturamos o leite condensado cos ovos, engadimos tamén a rela e o zume de catro limas e remexemos moi ben até que fique uniforme. Botamos a mestura enriba da base de bolachas e levámolo ao forno, que previamente quentamos a 160º C, deixándoo uns 25 minutos con calor arriba e abaixo. Deixamos arrefriar ben e metémola varias horas na neveira para que estea ben fresquiña. Antes de servir mesturamos a nata co azucre glas e montamos cun batedor de globo, comezando a baixa potencia e subindo pouco a pouco até que debuxe sucos. Coa axuda dunha manga pasteleira decoramos a torta ao gusto coa nata e enfeitamos con anaquiños de lima por enriba.