Sen publicidade nin promoción, case de sorpresa de non ser por algunha filtración da portada, viu a luz este directo dunha das bandas de doom metal máis importantes do panorama actual. Algo que sorprenda aínda máis sabendo que a banda ten pensando editar o seu novo traballo de estudo entre marzo e abril, este xa co Papa Emeritus Zero como novo frontman.
A portada, no estilo místico propio de Ghost, mostra as estatuas dos tres papas nun escenario-altar onde os fans-fieis agardan a saída do seu líder. Un claro xeito de marcar o que se vai un atopar dentro deste disco, que non é outra cousa que os 15 temas máis destacados dende Opus Eponymus até Popestar, marcando así o fin dunha época e o comezo dunha nova, cos Nameless Ghouls totalmente renovados e a expulsión do Papa Emeritus III da banda.
Ghost en directo foi sempre unha banda que gaña moito coa posta en escena, tanto cos decorados, como coa pirotecnia, os diversos vestiarios e, en definitiva, o guión desa gran obra de teatro que é cada concerto dos suecos. Por desgraza, iso é algo que non queda rexistrado, xa que é algo que só se pode vivir in situ, mais o que si temos é unha fiel mostra de como soa a banda ao vivo nunha gravación de boa calidade.
Ceremony and Devotion é ese disco necesario chegado a este nivel da banda, aquel ao que os seus detractores nunca pensaron que chegaran e que seguen a mellorar con cada cerimonia que realizan ao longo do planeta. Este disco é unha mostra do que é a banda, ademais de un bo camiño para de iniciación para quen non os coñeza. E o momento para prepararse e asistir con devoción á cerimonia da igrexa de Ghost.
GHOST NAS REDES
Web: http://ghost-official.com
Facebook: http://facebook.com/thebandghost
Twitter: @thebandghost
LISTAXE DE TEMAS
01. Square Hammer
02. From The Pinnacle To The Pit
03. Con Clavi Con Dio
04. Per Aspera Ad Inferi
05. Body And Blood
06. Devil Church
07. Cirice
08. Ghuleh/Zombie Queen
09. Year Zero
10. Spoksonat
11. He Is
12. Mummy Dust
13. Absolution
14. Ritual
15. Monstrance Clock
