Este sábado disputouse a primeira xornada oficial dos Xogos Olímpicos cunha excelente actuación da representación do deporte galego en París, medalla incluída. O día comezou con vitoria da selección estatal de balonmán masculina, co porteiro cangués Rodrigo Corrales nas súas filas, por 25 a 22 fronte ao combinado de Eslovenia. Outro Rodrigo, mais este caso Rodrigo Conde, conseguiu o pase ás semifinais do dobre scull masculino de remo canda o catalán Aleix García, e os judokas Laura Martínez e Fran Garrigós, que marchou de alí cun bronce colgado do pescozo, puxeron patas arriba o Champ de Mars Arena.
E este domingo teremos por diante unha nova e intensa xornada olímpica que comezará de novo sobre o tatami, ás 10 horas, co judoka David García (-66 kg), catalán que compite, igual que Martínez e Garrigós, con licenza galega. A loita polas medallas terá lugar a partir das 16 horas nese mesmo escenario.
Pasadas as 12 horas do mediodía será a quenda do boxeador Enmanuel Reyes Pla, orixinario de Cuba pero nacionalizado e afincado desde hai anos na Coruña, quen se medirá na primeira rolda da súa categoría (92 kg) ao chinés Xuezhen Han.
E ao fío das 12.35 horas comezará a primeira regata da modalidade 49erFX para a ourensá Támara Echegoyen e mais a súa compañeira a balear Paula Barceló, no seu caso desde a cidade de Marsella.
Ás 13.30 horas chegará a quenda de Paula Ginzo e María Araújo, que coa selección estatal feminina de baloncesto se medirán á China no seu debut nestes Xogos Olímpicos.
E ás 19 horas haberá representación galega feminina por partida dobre en outros dous deportes: balonmán, con Alicia Fernández —no caso de que supere as molestias que arrastra desde hai tempo e que lle impediron estar na estrea con derrota ante Brasil—, e fútbol, da man de Teresa Abelleira —quen partindo desde o banco contribuíu a asegurar os tres puntos contra Xapón—.
