Os Estados Unidos de América iniciaron un proceso de reforzo da súa presenza militar en Oriente Medio, entre outras accións, co traslado de cruceiros, destrutores e avións adicionais á rexión. Así o anunciou nas últimas horas o secretario de Defensa estadounidense, Lloyd Austin, no que cualificou como un intento dos EUA de "rebaixar a temperatura".
"Para manter a presenza dun grupo de ataque de portaavións en Oriente Medio, ordenei que o USS Abraham Lincoln substitúa o USS Theodore Roosevelt a finais deste mes", dixo o secretario de Defensa dos Estados Unidos durante unha rolda de prensa.
"Tamén ordenei o envío á rexión de máis cruceiros e destrutores capaces de defenderse contra mísiles balísticos. E ordenei o despregamento doutro escuadrón de cazas en Oriente Medio para reforzar alí as nosas capacidades de apoio aéreo defensivo", engadiu.
Previamente, The Washington Post informou de que o portaavións estadounidense USS Theodore Roosevelt e polo menos outros cinco buques de guerra desprazáronse nos últimos dous días desde o golfo Pérsico (entre a Península da Arabia e o Irán) cara ao golfo de Omán (entre o Irán e os Emiratos Árabes).
Mensaxes a Irán e Israel
Pola súa parte, o secretario de Estado estadounidense, Antony Blinken, afirmou que Estados Unidos, xunto cos seus aliados, enviaron unha mensaxe directa a Israel e Irán para advertirlles de que ninguén debe seguir intensificando as tensións na rexión. Ademais, subliñou que Washington segue traballando intensamente para reducir as tensións na zona e evitar que o conflito se agrave.
"Nos últimos días estivemos en contacto permanente cos socios da rexión e seguiremos niso", afirmou Blinken. "Levamos a cabo un intenso labor diplomático con aliados e socios, comunicando esta mensaxe directamente a Irán, e comunicamos esa mensaxe directamente a Israel", insistiu o secretario de Estado dos EUA.
Estas declaracións prodúcense no medio dunha nova escalada do conflito entre Israel e os Estados da rexión. Tras o asasinato en Teherán do líder político do grupo palestino Hamás, Ismail Haniya, e a morte do comandante militar do movemento libanés Hezbolá, Fuad Shukr, nun ataque israelí en Beirut, Israel prepárase para facer fronte a un "inevitábel" ataque de represalia por parte de Irán.
