Un pesqueiro atracado no peirao de Camariñas ardeu durante toda a noite e os medios desprazados continúan actuando no punto, onde o lume está controlado pero non extinguido, segundo informa o servizo de emerxencias 112 Galicia.
Pasados dez minutos das dúas da madrugada, un particular informou de que estaba a arder un barco de pesca atracado no novo peirao de Camariñas. Tamén explicaba que as chamas xa alcanzaban o posto de mando e que se escoitaban explosións, sen que houbese persoas afectadas.
O barco ardeu durante toda a noite e os medios continúan actuando no punto, onde o lume está controlado pero non extinguido.
— 112 Galicia (@112Galicia) September 4, 2024
📍 Peirao novo de Camariñas.
🔗 https://t.co/Ho1z2k6BjB https://t.co/fC3MLLgygg
Desde o 112 informouse a Salvamento Marítimo, ao Servizo de Gardacostas da Galiza, á Garda Civil, aos Bombeiros de Cee e de Carballo e á Agrupación de Voluntarios de Protección Civil de Camariñas.
Foron estes últimos os que, ao chegar ao lugar, comprobaron que na embarcación había varios elementos de risco como bombonas de osíxeno. Nese momento, Salvamento Marítimo traballaba xa na extinción do lume desde o buque Salvamar Altair. Tamén precisaron que na cuberta do barco había dúas bombonas de butano.
Con todo, confirmaron que non había outras embarcacións próximas que corresen perigo. Ademais, a Xunta activou o Plan Territorial de Contixencias por Contaminación Mariña Accidental en fase de alerta para conter e controlar un posible vertido polo incendio.
Pouco antes das nove da mañá, os Bombeiros de Carballo sinalaron desde o punto que o lume estaba controlado, aínda que seguen traballando para a súa total extinción, resultando só afectado o barco no que se orixinou.