A Galiza rexistrou unha nova vivenda de uso turístico cada dúas horas durante o verán

O número de vivendas de uso turístico (VUT) na Galiza aumenta ano tras ano desde que os rexistros levan a contabilidade deste tipo de inmóbeis. O Instituto Nacional de Estatística (INE) apunta que o incremento das VUT na Galiza nestes dous últimos anos apenas tivo parangón. Se a media estatal no aumento de pisos turísticos de 2022 a 2024 foi de 23%, na Galiza situouse por riba de 40%. Segundo o Rexistro de Empresas e Actividades Turísticas da Galiza (REAT), en agosto de 2024 existen no territorio galego 29.080 aloxamentos turísticos, dos cales 24.852 son vivendas de uso turístico (VUT). Nunca tantos pisos turísticos houbo, unha oferta en aumento a medida que nestes anos incrementaba o debate sobre a súa regulación e as consecuencias destes negocios. Empresas foráneas xestionan mil pisos turísticos na Galiza, 31% máis que hai un ano Estas 24.852 VUT en agosto son 1.080 máis que as que había apenas dous meses antes, en xuño: 23.772. Así pois, durante o verán apareceron 12 vivendas de uso turístico novas cada día. Unha cada dúas horas. De facer unha comparación interanual, agosto de 2024 fronte a agosto de 2023, ese aumento nos pisos turísticos foi de case 4.800 nestes 12 meses. Un incremento porcentual de 23,6%. O informe da REAT do mes de agosto permite ter unha imaxe da realidade das VUT na Galiza en diferentes aspectos. Por exemplo, no que corresponde á súa repartición territorial. As Rías Baixas son o seu principal 'hábitat', coa ría de Arousa á fronte. Nas comarcas bañadas polas augas arousás —O Barbanza e O Salnés—está unha de cada catro VUT que hai na Galiza. De feito, hai concellos onde o número de prazas de VUT case iguala o de habitantes. É o caso de Sanxenxo (O Salnés), onde hai 858 prazas de pisos turísticos por cada 1.000 habitantes (en xuño de 2023 eran 753 prazas). En Barreiros (A Mariña) por cada 1.000 veciños e veciñas hai 867prazas de vivendas para turismo (eran 691 hai un ano) e en Carnota (comarca de Muros) teñen 509 prazas de VUT por cada 1.000 residentes no concello. Tendo en conta o número de prazas por quilómetro cadrado do concello, Sanxenxo é o que máis destaca, con 340 prazas por quilómetro cadrado, seguido do Grove (O Salnés), e A Coruña (comarca homónima) con 182 e 174 prazas por km2 respectivamente. Propiedade As vivendas de uso turístico repártense entre dous tipos de propietarios: As persoas individuais, donas de 21.827 vivendas, e as empresas, que contan cun total de 3.025. É unha porcentaxe pequena, mais que vai en aumento a medida que este tipo de inmóbeis se consolida como unha oportunidade de negocio. En xuño, as VUT propiedade de empresas eran 2.819 —206 menos que en agosto—. Hai un ano —xuño de 2023—, os pisos turísticos xestionados por empresas eran 2.144, polo que nestes doce meses houbo un aumento de máis de 30% nas VUT en mans de sociedades privadas. O número de vivendas de uso turístico aumentou na Galiza en 3.700% en seis anos Desas tres mil vivendas xestionadas actualmente por empresas, 34%, unha de cada tres, están en mans de empresas de fóra da Galiza. Segundo os datos do propio rexistro da Xunta da Galiza, as firmas con sede en Madrid e Zaragoza son as que xestionan un maior número deste tipo de inmóbeis na Galiza: 211 e 132 respectivamente. En outubro de 2019 había na Galiza 5.400 vivendas de uso turístico (VUT). Facíase daquela un ano da entrada en vigor do decreto que regulaba este tipo de vivendas no país e existía xa un debate sobre o impacto deste tipo de inmóbeis e sobre a necesidade dunha maior regulación. Tres anos e medio despois, 2022, os pisos turísticos rexistrados superaban os 17.900 mentres que aqueles que se destinaban ao aluguer convencional eran 3.000, segundo as cifras da Federación Galega de Empresas Inmobiliarias (Fegein). Por cada piso para aluguer, seis vivendas de uso turístico. E a porcentaxe continuou a agravarse, pois a oferta para aluguer convencional ou residencial mantense e o número de VUT aumentou en varios miles. Ao tempo, o prezo da vivenda na Galiza continúa a moverse en parámetros de máximos. Mentres ao longo do ano 2023 a media do que se pagou por un piso ou casa nos Estados da Unión Europea aumentou en 0,2%, na Galiza ese incremento foi de 3,4%, unha porcentaxe sensibelmente superior. A voltas coas VUT: en que consiste a nova ordenanza que enfronta Goberno e oposición e quen a apoia? Menos pisos para alugar que nunca e máis vivendas de uso turístico que nunca. Unha combinación que se está a dar na Galiza e que, entre outras consecuencias, implica un aumento continuado dos prezos de arrendamento. O prezo da vivenda de aluguer na Galiza subiu 10,7% no primeiro trimestre deste ano en comparación co mesmo período de 2023. Para vivir O mercado residencial na Galiza ten no circuíto de comercialización 2.250 vivendas en aluguer, segundo datos da Federación Galega de Empresas Inmobiliarias (Fegein). A cifra supón que en apenas un ano ‘caeron’ do mercado ao redor de mil vivendas para arrendamento. Ao tempo, o número de persoas rexistradas á espera dunha vivenda de protección non para de aumentar. A 1 de setembro eran 11.971 as persoas anotadas no rexistro oficial da Xunta da Galiza como demandantes dunha vivenda en aluguer. Delas, 2.986 figuraban como demandantes dun inmóbel en arrendamento con opción a compra.