Dous episodios de violencia machista tiveron lugar na noite do sábado ao domingo en Galiza, un en Carballo e outro en Pontevedra, e en ambos os dous as vítimas foron ex-parellas dos presuntos agresores. A persoa detida en Carballo está xa en prisión. Foi detido na súa casa despois que na noite do sábado ao domingo dera tres coiteladas á que fora a súa ex-parella á saída dun bar de copas. Ela estaba gozando dunha cea de empresa cando o varón se ofreceu a acompañala ao seu vehículo. Foi alí, no aparcadoiro, onde a tería acoitelado, no ombreiro e na mama, para despois darse á fuga. A vítima non quixo presentar denuncia.
En Pontevedra foi detido un varón de 46 anos de idade por bater nun local de copas na súa ex-parella. Un particular alertou á Policía despois de que esa persoa empurrase e comezase a golpear á muller no interior do local. A intervención de varios clienets derivou nun altercado. O detido está acusado de cometer un delito de xénero.
