A Galiza despide esta terza feira os tres tripulantes galegos falecidos no naufraxio do 'Argos Xeorxia'

As localidades galegas de Vigo, Baiona (comarca de Vigo) e Noia (comarca homónima) despiden esta terza feira aos mariñeiros César Acevedo, Santiago Leyenda e Antonio Barreiro, tripulantes do palangreiro 'Argos Xeorxia', falecidos no naufraxio do buque ocorrido o pasado 23 de xullo, ao oeste das Malvinas.

Os corpos dos mariñeiros chegaban nas últimas horas a terras galegas, nun voo procedente de Reino Unido con escala en Madrid, e foron recibidos na terminal coruñesa de Alvedro por familiares e achegados, así como polo delegado do Goberno na Galiza, Pedro Blanco, e o conselleiro do Mar, Alfonso Villares. Tras o traslado ás súas respectivas localidades e os velorios, está previsto que esta terza feira sexan enterrados ou incinerados.

Así, o corpo do patrón de pesca do 'Argos Xeorxia', César Acevedo, de 55 anos de idade, é velado no tanatorio particular da parroquia viguesa de Valadares, e ás 19 horas decorrerá unha misa antes da incineración.

Pola súa parte, o cociñeiro do barco, Santiago Leyenda, de 39 anos, é velado no tanatorio de Sabarís, en Baiona, e ás 17,45 horas terá lugar a condución do corpo á Colexiata de Baiona, onde decorrerá o funeral previo ao enterro.

Mentres, o segundo enxeñeiro do 'Argos Xeorxia', Antonio Barreiro, natural de Noia, será despedido na estrita intimidade familiar cunha misa que terá lugar no complexo funerario Apóstolo de Santiago, antes da súa incineración.

O afundimento do buque, cuxas causas están a ser investigadas polas autoridades do Reino Unido, deixou un balance de nove persoas falecidas, 4 desaparecidas, entre elas o ribeirense Juan Antonio García Rey, e 14 sobreviventes.

O pasado 28 de xullo chegaban á Galiza os catro sobreviventes galegos, e esta segunda feira fixérono os corpos dos tres falecidos galegos, que previamente foron sometidos a estudos de autopsia en Oxfordshire (Reino Unido).