O Consello de Ministros declarou como zonas afectadas gravemente por unha emerxencia de protección civil 176 territorios de 14 comunidades autónomas, entre eles, os municipios de Tomiño (Baixo Miño), Crecente (A Pardanta), Oroso (Ordes) e Lugo.
A declaración corresponde a sucesos relacionados con fenómenos meteorolóxicos adversos, incendios forestais ou catástrofes de todo tipo entre o 27 de febreiro e o pasado 14 de setembro e abre as portas a poder beneficiarse das axudas previstas na Lei 17/2015 do Sistema Nacional de Protección Civil.
En concreto, o caso de Tomiño débese ao incendio declarado o pasado 11 de maio nunha empresa de produtos hortícolas que obrigou a activar o plan de emerxencias ao arder produtos químicos.
O de Crecente fai referencia ao grande incendio forestal que a comezos de setembro afectou 300 hectáreas e motivou o desaloxo provisional dunha vintena de veciños e veciñas pola proximidade das chamas a núcleos habitados.
Ademais, tamén declaran zona afectada gravemente por unha emerxencia o municipio de Oroso polo accidente o 22 de marzo na AP-9 dun camión que transportaba gasoil e que derramou a carga pola estrada.
Por último, o polígono do Ceao, no municipio de Lugo, viviu o pasado 26 de marzo un incendio industrial declarado na nave dunha empresa de despezamentos que deixou dous traballadores feridos.
176 zonas afectadas no Estado
"[Estes sucesos] provocaron danos persoais en infraestruturas e en bens públicos e privados que xustifican sen ningunha dúbida a intervención da administración", sinalou o ministro do Interior, Fernando Grande-Marlaska, na rolda de prensa posterior ao Consello de Ministros.
Ademais dos catro concellos galegos aos que lles afecta esta declaración hai zonas e comarcas de Andalucía, Aragón, Canarias, Castela-A Mancha, Castela e León, Catalunya, Comunidade de Madrid, Nafaarroa, Comunitat Valenciana, Estremadura, Illes Balears, A Rioxa e Murcia.
Nun comunicado posterior, Interior lembrou que as axudas que competen a Interior son as de falecemento ou por incapacidade absoluta e permanente (18.000 euros) e as destinadas a particulares por destrución ou danos en obxectos de primeira necesidade (o custo cun límite de 2.580 euros). Ademais, tamén son competencia do Ministerio as axudas por destrución total da vivenda habitual (o custo dos danos, cun máximo de 15.120 euros); as enfocadas a emendar os danos á estrutura da vivenda habitual (50%, cun máximo de 10.320 euros) e as utilizadas para os danos na vivenda habitual en xeral (50%, cun máximo de 5.160 euros).
Ademias detallou que son da súa competencia as axudas por danos a elementos comúns dunha comunidade de propietarios (50%, cun máximo de 9.224 euros) e as destinadas a persoas físicas ou xurídicas que levasen a cabo prestacións persoais e de bens (o importe total dos gastos).
Así mesmo, tamén compete ao Ministerio as axudas aos titulares de estabelecementos industriais, mercantís e de servizos, incluídos os agrarios, marítimo-pesqueiros e turísticos (até 9.224 euros) e as enfocadas a corporacións locais por gastos derivados de actuacións inaprazables (entre 50 e 100% segundo os casos).
