O Tribunal Superior de Xustiza da Galiza vén de dar a razón á Federación Down Galiza emitindo unha sentenza na que considera "discriminatoria" a orde de axudas para libros de textos e material escolar do Goberno galego, unha resolución que agora deberá modificar de cara ao novo curso académico.
O alto tribunal galego certifica que a normativa, nos termos nos que está redactada, resulta "discriminatoria", e considera "indubidábel" a diferenza de trato ás e os alumnos escolarizados en centros ordinarios a respecto dos que están en centros específicos ou en unidades de educación especial.
O TSXG emitiu esta sentenza en resposta ao recurso presentado en xullo de 2023 pola Federación Down Galiza contra unha orde do 10 de maio dese ano pola que a Consellaría de Educación convoca axudas para adquirir libros de texto e material escolar destinadas ao alumnado matriculado en educación primaria, secundaria e educación especial en centros sostidos por fondos públicos.
Segundo a sentenza, "non se atopa unha xustificación razoábel para conceder as axudas de forma prioritaria ao alumnado que recibe educación en centros específicos ou en unidades de educación especial en centros ordinarios".
Down Galiza urxe modificar a normativa
O presidente de Down Galiza, Delmiro Prieto, explicou en rolda de prensa como funciona este sistema de axudas na práctica. As e os estudantes matriculados en réxime de educación especial reciben 300 euros para libros de texto e 75 euros para material escolar co único requisito de estaren matriculados nun centro de educación especial, mentres que as axudas para o alumnado con discapacidade escolarizado en educación ordinaria "dependen da renda da unidade familiar".
O mesmo sucede coas e cos estudantes cunha discapacidade igual ou superior a 65%, que, segundo as explicacións do colectivo, reciben o importe máis alto sen cumprir outros requisitos. A Federación Down Galiza instou a Administración galega a modificar "cando antes" a orde de axudas de libros e material escolar para o curso 2024-25 "nos mesmos termos que as anteriores".
Unha década de reclamacións
Despois de dez anos de reclamacións á Xunta, a Federación decidiu presentar un recurso contra a mencionada orde en xullo do ano pasado ante a "clara discriminación da normativa". Delmiro Prieto subliñou que, após insistir durante dez anos ante a dirección xeral correspondente para que modificase esta anomalía, decidiron "dar o paso" e agora, un ano despois, "hai unha sentenza en firme do Tribunal Superior de Xustiza".
Así mesmo, explicou que esta sentenza "implica que se poña fin á discriminación á que durante os últimos anos estiveron sometidas as familias que optan pola escolarización en escolas ordinarias".