"No tema de Altri as cousas son sinxelas", afirmou esta mañá na Radio Galega o xefe de informativos da radio pública, Alberto Varela. "Se non cumpre coa normativa medioambiental non se pode instalar na Galiza, se cumpre si. Tanto é así que se cumpre os requisitos e se lle di que non o funcionario estaría prevaricando", resolveu.
Varela axiña virou o seu discurso cara o informe sobre Altri presentado esta quinta feira polo Consello da Cultura Galega (CCG), un estudo demoledor que bota por terra as promesas da factoría portuguesa e advirte do risco de "fractura do territorio" se o proxecto Gama vai adiante na Ulloa.
Un discurso calcado
O xefe de informativos da emisora pública acredita no traballo dos técnicos que están a avaliar a iniciativa, "que é o que toca", mais desacredita o traballo do colectivo de persoas expertas que nos últimos meses analizaron toda a información dispoñíbel sobre as intencións de Altri en Palas de Rei, a petición do CCG, para concluír que a súa oferta industrial achegará 1.956 empregos menos, requirirá 190.000 hectáreas máis de eucaliptos e suporá novos riscos para a saúde da veciñanza.
"Estas últimas horas coñeciamos un informe emitido polo Consello da Cultura Galega. Si, O Consello da Cultura Galega analizando un asunto medioambiental. Falan do impacto no turismo rural e lanzan hipóteses sobre que habería que plantar máis eucalipto. As cousas no seu contexto, outros informes din todo o contrario", reprochou Alberto Varela.
O seu discurso semella un calco do trasladado esta quinta feira polo Partido Popular tras se coñecer as principais conclusións do estudo. Nun comunicado, os eurodeputados Francisco Millán Mon e Adrián Vázquez poñen en cuestión a experiencia e profesionalidade dos "supostos especialistas" que redactaron o informe.
Para o PP galego, o informe do CCG "contrasta coa independencia dos funcionarios da Xunta, que analizan a proposta de forma rigorosa e atendendo só a criterios técnicos".
Ademais, reprobaron a iniciativa do Consello nos mesmos termos que, poucas horas despois, reproduciu Varela na Radio Galega: "Que fai un órgano especializado en cultura valorando unha instalación industrial de tanta complexidade e envergadura", censurou esta quinta feira o PP.
Sarcasmo
Alberto Varela avanzou na súa análise cunha defensa do sector industrial, que na Galiza, dixo "representa 17% do PBI segundo datos do INE e o reto é chegar ao 20%". "Non por capricho", puntualizou, "senón porque nas fábricas cóbrase máis que nas cafeterías e o emprego adoita a ser máis estábel".
"Cando toque avaliar o estado da literatura ou do patrimonio ímoslle ter que pedir informe ao Consello de Biólogos", finalizou.
