As pensións máis baixas do Estado percíbense na Galiza, o 47% delas por baixo do limiar da pobreza

Os ingresos medios das pensións situáronse na Galiza a finais de febreiro en 1.070,4 euros. Segundo os datos achegados polo Instituto Nacional da Seguridade Social (INSS) do Ministerio de Inclusión, Seguridade Social e Migracións -e estipulados por provincias-, recibían algún tipo de pensión contributiva 305.565 persoas na Coruña, 113.009 en Lugo, 107.499 residentes de Ourense e 248.913 de Pontevedra. A contía das pensións varía en función da estrutura produtiva dos diferentes territorios galegos e da súa realidade política, económica, social e sindical. Así, as retribucións medias na Coruña sitúanse en 1.112,1 euros ao mes, as de Lugo en 969,5, as de Ourense en 926,5 e as de Pontevedra en 1.155. Neste sentido, a pensión media galega está 180,3 euros ao mes por baixo da estatal, situada en 1.250,7 euros, só cobrando unha contía inferior ás galegas e aos galegos a cidadanía estremeña, cunha percepción mensual de 1.050,3 euros. Porén, a pensión en Ourense e Lugo atópase á cola de todo o Estado. As chaves das rendas As diversas clases de pensións deixan rendas moi diferentes que dan unha imaxe máis axustada da situación económica e social deste colectivo. Neste sentido, os ingresos medios das 23.227 persoas que na Galiza perciben unha pensión de orfandade sitúanse en 495,7 euros de media ao mes e os ingresos medios das 73.259 persoas que perciben unha pensión de incapacidade permanente están en 1.054,9 euros; mentres que os ingresos medios das 183.927 persoas que teñen pensión de viuvez sitúanse en 757,4 euros. Aliás, os ingresos medios das 6.841 persoas que perciben unha pensión a favor de familiares sitúanse en 653,8 euros e, finalmente, os ingresos medios das 487.732 persoas cunha pensión de xubilación sitúanse en 1.224 euros. As contías das pensións presentan diferenzas en función do réxime de cotización das persoas perceptoras. Así, as 455.723 adscritas ao Réxime Xeral na Galiza perciben uns ingresos de 1.221,3 euros ao mes, situándose na Coruña en 1.285,2, en Lugo en 1.199,8, en Ourense en 1.026 e en Pontevedra en 1.237. Precisamente, o maior continxente asociado a este réxime atópase na área atlántica, con 332.547 persoas. A retribución das persoas pensionistas na Galiza que cotizaron por este réxime está 126,7 euros mensuais por baixo da media do conxunto do Estado, presentando uns rexistros peores ademais da Galiza, Andalucía, Canarias, Estremadura e a Rexión de Murcia. Ourense volve presentar as cifras máis negativas de todo o Estado español. O poder adquisitivo das pensións galegas caeu en 25% desde 2011 Os 52.484 pensionistas galegos que cotizaron durante a súa vida laboral polo Réxime Especial de Traballadores do Mar perciben uns ingresos medios de 1.179 euros, sendo 48,3 euros inferiores á media estatal e estando á cola do conxunto do Estado. Nesta dirección, as retribucións máis baixas percíbenas os 25.217 residentes na Coruña, con, de media, 1.124,3 euros mensuais; e as máis elevadas os 24.496 asentados en Pontevedra, con 1.228,2 euros.Aliás, nesta anualidade, as pensións por réxime na Galiza seguiron diverxendo coas do Estado, sendo superadas na súa contía polas andaluzas. As pensións máis baixas do Estado percíbenas 236.271 persoas que cotizaron durante a súa vida laboral polo Réxime Especial de Traballadores Autónomos (RETA). Segundo os datos fornecidos polo Instituto Nacional da Seguridade Social (INSS) do Ministerio de Inclusión, Seguridade Social e Migracións, en febreiro de 2024 percibían unha contía media para o conxunto da Galiza de 752,3 euros mensuais. As retribucións máis reducidas recíbenas os 52.820 cidadáns xubilados polo RETA en Lugo, con 707,3 euros mensuais. A continuación sitúanse 37.269 persoas en Ourense, cunha pensión media de 721,5 euros mensuais, seguidas de 85.850 na Coruña con 773,5 euros e, por último, 60.332 en Pontevedra con 780,7. Traballadores por conta propia A contía da pensión dos galegos e das galegas adscritas ao réxime de autónomos está en 109,2 euros mensuais por baixo da media estatal. A diferenza entre a cantidade percibida por un autónomo vasco -cuxa pensión está á cabeza do Estado- e un autónomo galego é de 279,6 euros ao mes. A fenda entre os traballadores e as traballadoras por conta propia da Galiza e do resto do Estado non deixa de incrementarse, aumentando esta diferenza no último ano en 4,2 euros, e subindo en 13 euros con respecto a Euskadi. As pensionistas galegas cobran 470 euros menos ao mes que os homes As perspectivas de futuro non son mellores para este colectivo, sinalando o Grupo de Investigación en Pensións e Protección Social da Universidade de Valencia que “o réxime de autónomos sairía máis prexudicado, no incremento do período de cálculo das pensións, cunha baixada de 10,3%, debido a que no de autónomos non se integran as lagoas de cotización”. As diferentes contías entre as pensións dos autónomos e dos asalariados non deixas de medrar. Así, a pensión media percibida polos primeiros para toda a Galiza sitúase en 752,3 euros mensuais, colocándose no caso dos segundos en 1.221,3 euros mensuais. Neste sentido, a diferenza mensual entre unha retribución e outra no mes pasado foi de 469 euros, situándose en 2023 en 454 euros e en 2022 en 423 euros. As pensionistas máis empobrecidas do Estado español viven na Galiza O último informe presentado sobre O estado da pobreza na Galiza, referido ao exercicio 2022 e divulgado pola Rede Europea de Loita contra a Pobreza e a Exclusión Social na Galiza (EAPN-Galiza) en outubro de 2023, confirmou un proceso continuado de empobrecemento entre as persoas maiores de 65 anos, como consecuencia da perda de poder adquisitivo das súas pensións. Máis de 182.900 galegos e galegas, 86% maiores de 65 anos, viven en condicións de pobreza severa A situación ten particular gravidade para este colectivo. Os datos de EAPN-Galiza destacan que 364.814 galegas e galegos reciben unha pensión cun importe inferior ao mínimo considerado para non ser pobre (721 euros ao mes), 47,4% do total”. Así, increméntase o número de pobres nesta faixa de idade en 8.515 persoas. Os pensionistas rexistran un estado moi vulnerábel. Segundo se recolle no informe EAPN-Galiza, 158.038 pensionistas galegas e galegos atópanse en situación de pobreza severa, salientando o relatorio que están “nesta situación 37,2% das prestacións de viuvez, recibidas maioritariamente por mulleres”. EAPN-Galiza considera que estes datos revelan que a situación na Galiza é bastante peor que a nivel estatal, 11,6 puntos peor, pois a media estatal estabelece que 35,8% do total de prestacións que reciben as persoas pensionistas atópanse por debaixo do limiar da pobreza. O dato do limiar da pobreza severa tamén é máis elevado nas comunidades autónomas xa que a nivel estatal se sitúa nun 14,7% do total das pensións percibidas en España”.