O motivo polo que o Estado español incumpre a Carta Social Europea no relativo aos despedimentos improcedentes

Segundo estabelece o Comité Europeo de Dereitos Sociais nas súas conclusións anuais publicadas esta cuarta feira, o Estado español non cumpre coa Carta Social Europea no concernente ao regulamento aos despedimentos de forma improcedente. O Estatuto dos Traballadores determina a indemnización por despedimento improcedente en 33 días por ano traballado até un máximo de 24 meses de salario. A isto pódense engadir 15 días por ano traballado até un máximo de 12 mensualidades “en atención ás circunstancias concorrentes e aos prexuízos ocasionados pola non readmisión ou pola readmisión irregular”. Neste sentido, "o comité considerou que hai incumprimento pois aínda que a situación de readmisión sexa a regra xeral, cando esta non é posíbel, o xuíz non pode conceder unha indemnización adecuada e reparadora máis aló do límite [estabelecido no Estatuto dos Traballadores]", explicou a profesora Carmen Salcedo nun artigo na Revista Xurídica dos Dereitos Sociais. Pregunta no Congreso Probabelmente sen que aínda fose coñecido o dítame por parte dos deputados e das deputadas do Congreso estatal, este tema foi tratado precisamente na sesión plenaria da Cámara Baixa, en base a unha pregunta que o deputado do BNG, Néstor Rego, realizou ao ministro da Presidencia, de Xustiza e de Relacións coas Cortes, Félix Bolaños. A CIG rexeita o "boicot" do Goberno español aos mecanismos de control da Carta Social Europea "Hoxe mesmo [por esta cuarta feira] estase debatendo no comité a recusación [o rexeitamento da participación no comité] que vostedes presentaron contra a profesora Dona Carmen Salcedo, entendo que por considerar que podería ser favorábel a reclamar accións sindicais e sociais como as presentadas en relación coas condicións de despedimento ou o salario mínimo interprofesional", argumentou o nacionalista. "Impulsaron manobras para impugnar a lexitimidade da CIG", dixo Rego "E si, impulsaron [no Executivo estatal] manobras obstrucionistas como as alegacións presentadas pretendendo impugnar a lexitimade da CIG, a primeira central sindical na Galiza, en representación dos traballadores e das traballadoras para interpor unha reclamación contra o incumprimento da Carta Social Europea", afondou o deputado en relación aos recursos presentados polo sindicato nacionalista ante o Comité Europeo de Dereitos Sociais e á resposta que isto xerou desde o Goberno español. "Por que? Trátase de evitar que quede en evidencia que o Goberno incumpre a Carta Social Europea?", censurou Rego na súa pregunta a Bolaños. "Alegan que se trata dun sindicato galego e non estatal, debería darlle vergoña señor ministro porque isto é puro centralismo, mais aínda por riba, non respecta a legalidade, porque vostede sabe que a CIG ten a consideración de 'sindicato máis representativo' a nivel estatal en aplicación dos criterios da Lei de Liberdade Sindical, ten esa condición no conxunto do Estado e representación por exemplo no Comité do Consello Económico e Social, a pesar que vostedes nunca convocan o chamado diálogo social, que precisamente por iso será sempre parcial e cuestionábel", acrecentou o representante do BNG en alusión ao feito de que só CCOO e UXT sexan os sindicatos convidados ás negociacións nas reunións a tres bandas con Goberno estatal e patronal. O Congreso rexeita a indemnización de 45 días nos despedimentos improcedentes Néstor Rego, deputado do BNG: "Deben rectificar, respectar o pluralismo sindical e recoñecer a todos os efectos a representatividade da CIG" "Señor Bolaños, deben rectificar, respectar o pluralismo sindical e recoñecer a todos os efectos a representatividade da CIG conforme á lei, porque se non respectan á CIG, non respectan aos traballadores e ás traballadoras galegas. Deben deixar de obstruír un dereito sindical esencial como o de reclamación colectiva. Rectifiquen, teñen, poden e deben facelo", concluíu. A múltiples cuestión suscitadas por Rego foron ignoradas polo ministro, que deu unha sucinta réplica ao deputado do BNG, para posteriormente aproveitar o seu tempo de intervención para dirixirse de novo ao PP e a Vox. "Doulle a miña opinión e a miña interpretación da Lei de Liberdade Sindical, vostede ten outra, creo que esta cuestión deberase dirimir en todo caso na xurisdición social e ver como de representativa é unha organización sindical, se no ámbito galego ou no estatal. É dicir, nesta sesión de control podemos argumentar ou intercambiar opinións mais serán os tribunais do social quen decidan", argüíu. Félix Bolaños, ministro da Presidencia: "Deberase dirimir en todo caso na xurisdición social e ver como de representativa é unha organización sindical" Incumprimento a respecto da baixa por maternidade O Comité Europeo de Dereitos Sociais analiza tamén a reforma adoptada en 2019 na lexislación estatal, coa que se elevou de nove a 12 meses o período durante o cal unha muller en baixa por maternidade non pode ser despedida tras ser nai, agás na circunstancia de que se produza un despedimento colectivo. Con todo, a Carta Social Europea "unicamente admite tres supostos nos que se pode despedir [nesta casuística]: falta grave da traballadora, cesamento de actividades da empresa ou finalización do termo previsto no propio contrato", polo que o comité determina que o Estado español está incumprindo, explicou a profesora Salcedo. As achegas a mutualidades poderán ser recuperadas As devolucións a mutualistas foron impostas polo Tribunal Supremo Esta cuarta feira ficou habilitado un "sinxelo formulario" por parte da Axencia Tributaria para canalizar "o máis axiña posíbel" as peticións de devolución do imposto sobre a renda das persoas físicas (IRPF) por parte de pensionistas que realizaron achegas a mutualidades laborais. Facenda decidiu así facilitar as devolucións, despois de que unha sentenza do Tribunal Supremo dese a razón a un xubilado do sector bancario que pedía que parte da súa pensión, ligada ás achegas que realizou entre 1969 e 1979 á Mutualidade Laboral de Banca, non tributase nas declaracións do IRPF. Non hai necesidade de achegar documentación Non será necesario achegar á solicitude ningún tipo de documentación, posto que, en xeral, a Axencia Tributaria xa contará coa información precisa para a resolución da solicitude. Con todo, no caso de que non sexa posíbel resolver unha solicitude concreta coa información dispoñíbel, poderase requirir das interesadas a posteriori a achega da documentación que resulte necesaria. Este formulario poderase utilizar para solicitar todas as devolucións correspondentes ao período 2019-2023, o que aínda non prescribiu, aínda que para 2023, na maioría dos casos, o cálculo xa aparecerá no borrador da declaración.