Carboeiro tínguese de folk

Corenta anos leva o Concello de Oroso (comarca de Ordes) na promoción da música tradicional. Como resultado dese esforzo, xurdiron as asociacións folclóricas Lembranzas do Tambre, Buxos Verdes, Néboas no Cumio e a Asociación Cultural Argalleiros, que se dan cita no XI Festival Folk de Carboeiro. Se ben durante todo o ano as asociacións orosás realizan abundantes actividades docentes e divulgativas como obradoiros e encontros, a vila reserva este sábado un lugar central para a celebración do festival. O certame, que parte da unión de diferentes festivais impulsados con anterioridade por Lembranzas do Tambre na Illa Refuxio (1986) e por Buxos Verdes na parroquia de Senra (2004), decorrerá no Paseo do Carboeiro en Sigüeiro (Oroso) ás 13.30 horas cunha sesión vermú co grupo de Pandereiteiras Sen Fronteiros. Esta actuación amenizará a mañá até o xantar popular, con pinchos e barra. A Festa Folk aluma Fisterra Coas e cos comensais satisfeitos, procederase a continuar coa xeira folk da man de Buxos Verdes, Lembranzas do Tambre, Néboas no Cumio e Argalleiros. Finalmente, o festexo organizado en colaboración co corpo municipal despedírase cos grupos Xascariz, Carapaus e a Requinta de Lampai, rematando pasada a madrugada. Con este programa, sinala Lembranzas do Tambre, o festival aspira a ser “exemplo de rede e comunidade” entre os diferentes grupos folclóricos en toda mancomunidade de Ordes. Asemade, desexa atraer turismo e audiencia xa que, con todo, o principal interese do evento é ofrecer un espazo ao talento dos novos grupos emerxentes do folk galego, que se poden dar a coñecer no municipio este sábado 6 de xullo.