Como un proceso participativo de debate, con encontros con axentes da cultura galega e persoas interesadas no seu desenvolvemento presenta a AGPXC os debates que están a realizar arredor do documento “Pensamentos sobre: que facer coa cultura?”, un texto base que ten como intención “contribuír ao debido proceso de reflexión sobre a cultura que entendemos é preciso nestes momentos”.
Despois de que hai máis de medio ano se desenvolvese con numerosa participación o primeiro dos encontros na Coruña, a AGPXC convoca un novo debate xa que entenden que dentro do mundo da cultura “hai unha necesidade clara de xuntarse e falar para poñer en común estratexias que melloren o noso presente e enfoquen camiños futuros para a nosa cultura”. A nova cita será o día 25 de febreiro na Galería Santiago ás 16.30 e prevese unha duración de catro horas.
O debate terá como base o documento elaborado pola AGPXC -disponíbel na súa páxina- no que consideran que a crise “está a servir de coartada para desmantelar as estruturas culturais e poñer en perigo o dereito da cidadanía a acceder de xeito igualitario á cultura e ao coñecemento”. Para a Asociación, o mundo da cultura non está a vivir de maneira allea ao momento económico que afecta á sociedade mais denuncian que “os axustes orzamentarios en si mesmos non son o problema principal, sono se están acompañados de improvisación, falta de análise das súas repercusións, ausencia de estratexias alternativas e en demasiadas ocasións, se connotan un abandono de funcións”.
