Manipulación de cartas, cordas, mentalismo, números con vasoiras... a ilusión e a sorpresa son os efectos especiais dos “Momentos de Asombro”, o novo espectáculo do mago Martín Camiña que chega a Compostela este sábado. Humor, música e maxia subirán a escena nun encontro do que o público non queda alleo.
O mago participará tamén na novena edición da Semana do Libro e da Lectura de Carballo, que terá lugar do día 5 ao 9 de maio, como protagonista de tres obradoiros e o espectáculo “Feitizo”. Martín Camiña é un dos magos máis destacados do novo ilusionismo galego e ten en xira, ademais de “Momentos de Asombro” e “Feitizo”, os espectáculos “Corcheas, semifusas e ilusións”, maxia con música ao vivo, “Feitizo” tamén para teatros, ou “Encantamento”, maxia de preto, son algúns dos espectáculos que Camiña ten en xira, alén doutras propostas que se adaptan a distintos formatos e deseños.
Desde os catorce anos Martín Camiña comezou con pequenos trucos e comezou a buscar resposta ás preguntas que lle provocaban a actuación dos grandes magos ate que o mundo do ilusionismo se converteu na súa profesión e na súa paixón. Ao seu ver, as principais calidades para se dedicar á maxia son “en primeiro lugar a paixón. Ter ansia de aprender e estar ao día, como en calquera outra actividade. Compre tamén ter moita paciencia porque moitos dos efectos levan meses de ensaios. Paciencia, capacidade de comunicación e paixón, ese é o segredo”.
O n. 94 do Semanario Sermos Galiza inclúe unha entrevista con Martín Camiña.