Chega a Copa Galiza de balonmán

O balonmán galego ten unha cita este domingo coa Copa Galiza. Será na Coruña e terá como escenario o Pavillón San Francisco Javier da Coruña (comarca homónima). Serán dúas finais nas que xogarán, por unha parte, o OAR da Coruña ante o Balonmán Reconquista de Vigo ás 19 horas (masculina) e pola outra o Balonmán Carballal contra o Balonmán A Caniza ás 17 horas (feminina). En ambos os dous casos contarán coa retransmisión en directo pola TVG2. En opinión do presidente da Federación Galega de Balonmán (FGB), Bruno López, “é unha ledicia volver cun evento destas características a Coruña” e asegura que “desde a xunta directiva do OAR A Coruña púxose moito interese na celebración desta fase final”. Aínda así, recoñece que “a nivel de instalación temos moitas limitacións para poder montar todo o que acostumamos a desprazar, trataremos de adaptarnos, xa que cremos que esta pode ser unha primeira toma de contacto para a realización nun futuro de máis eventos que nos axuden a promocionar o balonmán na cidade, estamos seguros que as dúas finais serán moi emocionantes”. Atlético Guardés e Balonmán O Porriño comezan nova tempada na Liga Guerreiras Final masculina Desde a directiva do equipo anfitrión, o presidente do OAR, Carlos Resch explica a Nós Diario que acoller esta final forma parte da súa campaña de divulgación deste deporte na cidade. “Hai unha boa vontade por parte da Federación Galega de Balonmán coa que temos unha fronte común aberta para promocionalo”, admite. Desde o punto de vista deportivo, encaran o partido “con todas as ganas e toda a humildade de gañala, tendo en conta que é cun equipo da nosa categoría”. Ao compromiso copeiro, o equipo da cidade herculina chega tras unha tempada “completa, mesmo cos adversarios de categoría superior, como foi o caso do Cisne de Pontevedra, e chegamos con algunha baixa mais é importante para nós gañar este título”, admite, "máis ante un pavillón cheo na nosa cidade", agrega. Na final, o OAR atoparase un Balonmán Reconquista de Vigo que ven de eliminar nas semifinais a un dos conxuntos que sobre o papel partía coma favorito, a S.D. Teucro. O seu adestrador, Victor Garrido, admite en declaracións a Nós Diario que son conscientes “do poder económico que lle dá como favorito non só na copa senón tamén para a tempada en Primeira”. Porén, fai valer que o seu conxunto conta con “xogadores novos da área de Vigo e compensámolo con ilusión e sacrificio”. Para o Reconquista esta final “é un premio ao esforzo desta pretempada que os rapaces están a traballar moi ben”, ademais de ser “unha maneira de medir para ver onde nos podemos colocar ao longo do ano”. Xogar nunha “pista complicada” non lle dá medo e lembra a experiencia do ano pasado “cando sumamos puntos alí, algo que non é imposíbel”. O cangués Rodrigo Corrales logra o seu segundo bronce olímpico Final feminina Na final feminina estará o Carballal Balonmán, equipo recentemente ascendido á División de Honra Ouro estatal. O seu técnico, Javier Castro ‘Chiki’, admite a Nós Diario que, cando falta medio mes para comezar a competición, teñen por diante o “difícil reto da nova categoría” polo que están “máis centrados en tratar de iniciala da mellor maneira posíbel”. Con todo, ten claro que unha vez na final “trataremos de competila”. Neste sentido, afirma que o equipo “chega “bastante ben mais aínda nos faltan cousas por puír”. Sobre a tempada que rematou, o técnico lembra que de inicio non partían co obxectivo de ascender. “A ilusión era entrar nos postos de play-off, algo que fixemos e, malia as enquisas en contra, gañamos”, relata. Para este novo curso afírmase como defensor de contar como obxectivo “a permanencia” mais cun grupo compacto “co que levamos moitos anos e sempre optando por rapazas de casa mellorando as súas condicións”. O equipo vigués terá como rival o Balonmán A Caniza que actualmente milita na División de Honra Prata. O coordinador deportivo do club, Ismael Lago, indica a Nós Diario que afrontan a final “con ilusión”, igual que o ano pasado en Cangas con idéntico contrincante. “É un partido complicado e difícil”, confesa, “levan moito tempo xuntas e ademais reforzouse ante a liga, mesmo con dúas xogadoras nosas”, engade. Aínda así, aclara que “xogaremos para gañar, é unha posta a punto inmellorábel”. A propósito da tempada pasada, considera que foi “boa” polo obxectivo cumprido de manterse na División de Honra Prata, “que é o noso lugar”. A galega Alicia Fernández cae da lista da selección de balonmán por lesión Neste sentido, afirma que aspirar ao ascenso “é complicado mais traballamos por ser mellores cada día”. Non todo é perfecto nas campañas deportivas e a deste club da comarca da Paradanta non foi unha excepción. "Este pasado ano houbo bastantes complicacións co tema das lesións e iso lastrounos bastante, evitando que chegaramos máis arriba", relata. Por último, Lago coincide cos demais responsábeis dos equipos que participarán nesta Copa Galiza en que, como aconteceu outras tempadas, "abre a porta á ilusión que temos cada ano por competir e sacar o mellor das nosas xogadoras". Comeza a liga Asobal para o Cangas co Valladolid Na máxima categoría do balonmán estatal masculino, a liga Asobal, a competición comeza esta sexta feira cun interesante Valladolid-Cangas (Polideportivo Huerta del Rey, 20 horas). Os do Morrazo buscan repoñerse dunha pretempada irregular, con resultados que non deixaron satisfeito a Nacho Moyano. O técnico viu como o Novás impúñase ao seu equipo na final da Supercopa Galega o pasado 25 de agosto. Liga Guerreiras Na liga Guerreiras, esta fin de semana o Balonmán O Porriño ten unha cita co Gran Canaria na viaxe máis longa da tempada. A cita será o sábado no pavillón insular Antonio Moreno ás 19.30 horas. As galegas estreábanse na competición cunha vitoria ante o Zuazo por un cómodo 32-19. O Guardés, pola súa parte, xogará esta xornada ante o Sagunt no País Valencià está sábado ás 19.30 horas. As do Baixo Miño inauguraron a tempada tamén cunha vitoria na Sangriña ante o Xixón (24-15). A primeira data destacábel do calendario con protagonismo galego será o 28 de decembro, cando A Sangriña acollerá o primeiro Derbi As Nosas contra o Conservas Orbe Zendal Balonmán Porriño, evento encargado de despedir o 2024. A volta do derbi será no Porriño será o 19 de abril de 2025.