Unha de cal e outra de area na estrea olímpica da selección de baloncesto masculina de Sudán do Sur este domingo. Os de París son os primeiros Xogos nos que participa este país independizado oficialmente de Sudán no ano 2011, e non comezaron da mellor maneira posíbel... mais tiveron un final que os seus xogadores nunca esquecerán.
No momento de cantar os himnos no seu primeiro encontro da fase de grupos ante Porto Rico a organización confundiu o seu himno co peor co que o podían facer: o dos seus veciños de Sudán. Os xogadores mostraron estupefacción e enfado, igual que moitos dos seus compatriotas desde as bancadas do Stade Pierre Mauroy de Lille, e así o recolleron as cámaras.
🇸🇸 A new embarrassment at the Olympics!
— Lord Bebo (@MyLordBebo) July 28, 2024
Instead of the South Sudan’s anthem, the Sudanese anthem was played! The the audience instantly noticed it.
Reminder, at the opening ceremony of the Games, we recall, South Korean athletes were announced as the DPRK team. pic.twitter.com/QzEbawdkwM
Aos poucos segundos de que comezase a soar o himno erróneo a organización decatouse, parouno e pediu desculpas á República de Sudán do Sur para proceder, desta volta si, a proxectar polos altofalantes do pavillón a súa canción nacional.
Malia comezar perdendo o primeiro cuarto por 20 a 28, Sudán do Sur soubo darlle a volta ao partido para acabar vencendo cun marcador de 90 a 79 á selección portorriqueña.
Sudán do Sur quedou encadrado nun grupo no que a primeira praza sería, previsibelmente, para os Estados Unidos, que se estrearon con vitoria ante Serbia. Pasan a cuartos de final os dous primeiros de cada un dos tres grupos e os dous mellores terceiros.