A francesa Qair, a última firma que se suma á poxa pola eólica mariña galega

Xa son 19 os proxectos que aspiran a levar unha porción do suculento pastel da eólica mariña galega. A última firma en apuntarse á poxa —aínda pendente— polo espazo marítimo delimitado para este tipo de infraestruturas na costa da Galiza foi a francesa Qair Renewables, que vén de rexistrar no Ministerio para a Transición Ecolóxica o parque denominado Roleira, do que aínda se descoñecen os detalles. Polo de agora, mentres non avance a tramitación e a Administración estatal poña ao dispor da cidadanía toda a documentación relativa ao proxecto no portal de consulta pública do Miteco, o único que sabemos alén do nome é que tería unha potencia de 594 megawatts (MW) e que se situaría na área reservada para a eólica mariña dentro dos plans de ordenación do espazo marítimo (POEM) fronte á comarca do Baixo Miño. Neste mesmo emprazamento están a tramitarse outras catro centrais eólicas de semellante envergadura e diferentes promotores: Celta II (510 MW), de Ferrovial; Volanteiro (510 MW), de Capital Energy; Atlántico 1 (525 MW), de Repsol, e Juan Sebastián Elcano (552 MW), de IberBlue Wind, parte este último do que sería o primeiro proxecto de renovábeis transfronteirizo, pois a compañía complétao cos aeroxeradores que situaría a escasa distancia no espazo marítimo próximo a Viana do Castelo, en Portugal. Só coa potencia que sumarían estes parques —case 2,7 xigawatts (MW)— abondaría para cumprir o obxectivo fixado polo Goberno español de cara a 2030, cando prevé ter operativos entre 1 e 3 XW de eólica mariña. Resulta evidente, polo espazo delimitado para estas instalacións no suroeste do país, que non todos os proxectos poderán ser aprobados cando se realice a poxa, mais nesta altura xa se pode apreciar que o espazo marítimo galego é o máis cobizado polas promotoras, pois en conxunto Galiza é albo actualmente de 19 dos 66 proxectos de eólica mariña rexistrados no Miteco por algo máis de 11 XW de potencia, case a metade do total do Estado español —25 XW—. O 'Prestige' da eólica mariña Outra empresa estranxeira que quere o mar da Galiza Ferrovial, Iberdrola, Capital Energy, BlueFloat, Invenergy... até unha decena de compañías promoven os 19 parques previstos en augas galegas, e ningunha delas ten a súa sede na Galiza. Tampouco a multinacional Qair, fundada na rexión francesa de Occitania en 2020 a partir de Quadran International, que tres anos antes vendera a súa carteira de renovábeis a Direct Énergie —hoxe Total Energies— para centrarse na súa expansión internacional. Qair pretende alcanzar en 2027 unha potencia instalada de renovábeis de 3 XW, e para cumprir ese obxectivo presentou no Miteco outros dous proxectos alén do galego Roleira: o parque Gregal (180 MW), en Balears, e o Tamaragua (236 MW), en Canarias. Este último arquipélago é, de feito, o territorio do Estado con máis proxectos de eólica mariña propostos —29—, mais de menor envergadura —perto de 4 XW en total— que os que se localizarían no Atlántico galego. Completar a regulación do sector, o seguinte paso O número de parques eólicos mariños autorizados no litoral galego dependerá do desenvolvemento de toda a lexislación que regulará esta actividade, un proceso que culminará, cando estean determinados os cupos, coa convocatoria da poxa. Un camiño que parece algo máis despexado logo de que o Tribunal Supremo tombase, hai xusto un mes, o recurso da Plataforma en Defensa da Pesca contra os POEM. O conselleiro delegado da sociedade público-privada Recursos da Galiza (RDG), Emilio Bruquetas, estimaba nunha recente entrevista con Nós Diario que nesta primeira chamada ás empresas enerxéticas podería repartirse "entre un xiga e un xiga e medio".