![Varias vacas de leite nunha granxa da parroquia de Piñeiro en Xermade (Terra Chá). [Foto: Carlos Castro / Europa Press]](/asset/thumbnail,1280,720,center,center/media/nosdiario/images/2024/05/14/2024051415195867567.jpg)
A Federación Rural Galega (Fruga) alertou esta segunda feira de que "algunhas industrias [do sector lácteo] utilizan de forma fraudulenta o punto crioscópico, que mide a presencia de auga no leite, para acometer baixadas encubertas no prezo do leite". Por este motivo, o sindicato agrario demandou á Consellaría do Medio Rural a convocatoria da Mesa do Leite.
O punto crioscópico é un parámetro baseado no punto de conxelación do leite que permite comprobar a presenza de auga engadida neste produto. Así, a súa finalidade é previr certos fraudes que se poden dar na comercialización do leite.
O punto crioscópico atópase nun valor estimado de -0,512 graos. Polo tanto, un valor superior indica a existencia de auga engadida. Con todo, algunhas empresas, segundo a Fruga, están situando o valor de referencia en -0,515 ou -0,514.
"Isto quere dicir que a industria está a aplicar penalizacións por ter menor presenza de auga da considerada como normal", salientou a Fruga. "Estas penalizacións son aplicadas na maior parte dos casos e a súas contías poden chegar a tres céntimos de euro por litro", acrecentou.
