Apertas de familiares e sensación agridoce no recibimento dos catro sobreviventes galegos do naufraxio (a pasada segunda feira) do pesqueiro 'Argos Xeorxia' en augas de Malvinas á súa chegada a Santiago de Compostela.
Ás 13 horas deste domingo, o avión medicalizado, fretado polo Ministerio español de Defensa para traer de volta as vítimas, tomou terra na zona militar do aeroporto da capital galega. Segundo informou Defensa, durante o voo os sobreviventes estiveron acompañados polo persoal da Unidade Médica de Aeroevacuación.
Tras o voo, a espera en terra fíxose máis longa, se cabe, e é que o avión estivo 40 minutos na pista até que os sobreviventes foron trasladados nunha furgoneta até o lugar onde estaban as e os seus familiares.
Ás 13.45 horas producíase o primeiro abrazo e o recibimento por parte dos familiares e do presidente da Xunta da Galiza, Alfonso Rueda, do conselleiro do Mar, Alfonso Villares, do delegado do Goberno español na Galiza, Pedro Branco, e do alcalde de Ribeira (O Barbanza), Luís Pérez, entre outras autoridades.
As primeiras en abandonar a base militar foron as dúas ambulancias que permaneceron á espera da chegada do avión militar. Así, dous dos sobreviventes, segundo informou o delegado do Goberno español, foron trasladados para recibir asistencia médica.
Aos poucos, a comitiva política e os familiares abandonaron o aeródromo militar, sendo o último en saír un dos sobreviventes que, previamente, estivo falando con Pedro Branco e a subdelegada do Goberno español na Coruña, María Rivas.
A aeronave, que partiu do aeroporto de Stanley sobre as 21 horas (hora galega), continuou a súa ruta cara ao aeródromo de Torrexón de Ardoz, en Madrid, para levar, segundo fontes da Delegación de Goberno español, ao resto dos sobreviventes que ían na nave, excepto a un de orixe uruguaia.
Mentres tanto, os cadáveres dos mariñeiros falecidos serán trasladados a Oxfordshire, en Inglaterra, para que se lles realicen as autopsias, en cumprimento dos protocolos exixidos polas autoridades do Reino Unido.
Dos catro sobreviventes galegos, tres deles son de Ribeira e un de Pontevedra. Dos falecidos notificados, un é de Vigo e outro de Baiona (comarca de Vigo). Ademais, os dous desaparecidos galegos son de Noia (comarca homónima) e de Ribeira.
Así mesmo, do mesmo modo que fixo o presidente do Goberno español, Pedro Sánchez, Branco enxalzou o traballo do Executivo estatal e a coordinación dos Ministerios españois de Defensa, Exteriores, Pesca e Transportes para levar a cabo o operativo. Tamén, agradeceu o esforzo do Exército do Aire e de Unidade Médica de Aeroevacuación, así como a colaboración mostrada "en todo momento" pola Xunta.
