O secretario nacional da CIG-Ensino, Anxo Louzao, compareceu perante os medios de comunicación esta quinta feira (26 de maio) para denunciar publicamente "unha actuación ilegal" e "fraudulenta" na abertura dun "centro concertado da Igrexa" en Compostela.
A Igrexa tería ofertado 25 prazas das que concedeu 8 sen ter autorización da Xunta
No concreto, trataríase dunha unidade de Primaria situada na Casa do Neno para a que o Arzobispado tería solicitado o concerto. Así as cousas, denuncian desde CIG-Ensino, as prazas foron ofertadas --un total de 25-- e mesmo concedidas (8) sen contar coa autorización.
Responsabilidades
Así pois, a central sindical encamiñou un escrito á Comisión de Escolarización para denunciar a actuación, sinalou Louzao. Aliás, lembrou que Educación comunicou á Casa do Neno que as "necesidades educativas" da zona estaban cubertas cando esta solicitou "concertar dúas unidades" polo que lle propuña a abertura dunha de Primaria. Así as cousas, esta tería sido ofertada antes de ser autorizada pola Xunta.
Perante estes feitos, a CIG Ensino dirixiuse a Educación para "depurar responsabilidades". Asemade, Anxo Louzao, denunciou que o goberno galego "se pregue a disposición da Igrexa" cando a propia administración, di, "recoñece que non é necesario" máis un centro concertado que a institución relixiosa visa abrir en Belvís.
