Prospección de talento: Altri

O penúltimo episodio propagandístico de Altri para concitar interese público denomínase pomposamente: Prospección de talento para proxecto Gama. Foi traducido –malamente- á linguaxe ordinaria como “Greenfiber abre a súa bolsa de emprego para fábrica de fibras en Palas”. Tiveron bon coidado de non denominalo busca de traballadores, demanda de forza de traballo ou novos postos de traballos en Palas. Non, non se trata de nada a serio senón de saír á opinión pública para anunciar un futuríbel sen compromiso ningún. É só a primeira parte dun amago dun proceso de iniciación da ilusión de traballo nunha empresa non nata, dun proxecto non aprobado, dunha futura empresa cun capital descoñecido e cun suposto permiso de instalación con miles de alegacións, manifestando serias dúbidas sobre a idoneidade, en varios aspectos, da fábrica de pasta de celulosa -unha pasteira- a base de eucaliptos. Como prospección que é creará unha base de dados, tan rica e numerosa como sexa o número de desexos que se manifesten por escrito nun proceso que comeza cun cuestionario e seguirá cunha entrevista. Os dados persoais que se entregan son todos os legais permitidos, entregados voluntariamente, que permitirán deseñar o perfil e número de persoas dispostas ao traballo ou en condicións de acceder. Por iso, en lugar de limitar os currículos aos xa preparados para postos específicos coñecidos, infórmase de que non é relevante non se adecuar a ningún perfil específico de categorías profesionais, senón que calquera poderá ser admitido e preparado no seu caso pola própria empresa: en Portugal, ou aquí, en calquera centro inespecífico, tamén. Aínda así, e despois desa declaración de non especificidade na cualificación, cítanse 15 perfís técnicos de proceso de produción (non se sabe de que) de mantemento e de varios, desde laboratorio, seguridade, medio ambiente... Manobra propagandística A consideración que nos merece esta manobra propagandística da empresa cabeza (Altri) é de notábel deseño de imaxe ou de contrapropaganda fronte á enorme contestación social en todos os ámbitos: popular, cultural, intelectual e de futuros afectados en todas as comarcas con posíbeis afectados. O anuncio de apertura desta prospección semella a faena dun pescador pouco selectivo que sen ter grandes dotes de captura, bota redes e aparellos nunha mar procelosa e a esperar o que veña. De ter cero de adhesións nun segmento de cidadanía, pásase a captar supostas adhesións grazas á esperanza creada dun posto de traballo. Os que ‘piquen’ e cubran o cuestionario pasarán a formar parte dunha listaxe de “interesados”. Ilegal non é, mais correcto en termos éticos tampouco, é creación dunha falsa ilusión. Non se anuncia X número de postos de tal categoría, non se aclara cal é o proceso de produción con necesidade de técnicos, non se fala do número de persoas que van compor o cadro inicial de persoal, non se cita a preferencia sobre idades, sexo (cadro igualitario?), lugar de nacemento, desempregados de longa duración, traballadores en situación vulnerábel... É dicir, nada que se asemelle a unha demanda de traballadores cun contido real e especificado. É unha táctica de imaxe corporativa elaborada para contraatacar as evidencias postas de manifesto neste último ano. No plano de análise do proxecto desde a perspectiva medioambiental foron publicadas unha boa restra de dúbidas razoábeis sobre a adecuación do proxecto para Palas e para Galiza. Mesmo departamentos científicos da USC poñen en cuestión a idoneidade do proxecto. Entidades locais, medioambientais, de representación veciñal ou municipal teñen presentado alegacións que non teñen aínda resposta. Altri non existe máis que no papel O proceso está entreverado de propaganda política e propaganda da empresa, e desde a economía aínda é descoñecido o socio bancario (cerca do 50% esperado), o socio tecnolóxico (para fibra lyocell) e a dispoñibilidade de subvención a fondo perdido procedente de fondos públicos. E finalmente, importante tamén, a colaboración necesaria do goberno da Xunta que nos últimos meses ten logrado pórse de medio lado agachándose nos denominados técnicos, cando, como é sabido, os técnicos non son os depositarios do poder executivo, nin por tanto responsábeis das decisións políticas finais. Altri–Greenfiber-Gama non ofrece ningún posto de traballo, non abre bolsa de emprego algunha, por moito que certa prensa mendaz ou amiga trate de expresar. E non abre nada, porque aínda non existe máis que no papel e no desexo ardente dos promotores.